Protestuesit në Paris kërkojnë të mos ndalohet publikimi i fytyrave të policëve

Mijëra protestues u mblodhën në kryeqytetin francez për të kundërshtuar projektligjin që do e ndalonte publikimin e fytyrave të policëve në media. Mbështetësit e këtij projektligji thonë se do i mbronte policët dhe familjet e tyre nga sulmet në internet apo edhe kur nuk janë në detyrë.

Protestuesit, që një pjesë e madhe e tyre ishin gazetarë dhe aktivistë të të drejtave, thonë se ligji do cenonte lirinë e gazetarëve për të raportuar dhe do e vështirësonte mbajtjen e përgjegjësisë nga policia për abuzime si përdorimi i tepruar i forcës.

Në shehin Trocadero në Paris, protestuesit brohoritnin “Të gjithë duan të filmojnë policinë”, derisa një pjesë e tyre kishin veshur xhaketa të lëvizjes “Jelekët e Verdhë”.

Protesta të tilla janë planifikuar të mbahen edhe në Marsejë, Lille, Montpellier, Rennes e qytete të tjera, shkruan Reuters.

Projektligji i propozuar që ka kaluar në leximin e parë, është përkrahur edhe nga partia e presidentit Emmanuel Macron dhe aleatët e saj parlamentarë ndërsa të premten pritet të shkojë në lexim të dytë.

Kryeminstri Jean Castex, ka thënë se projektligji nuk do ndikonte në të drejtën për të informuar.

(Kosova Sot Online)