Si erdhi deri te sulmi ndaj Xhavit Drenorit, Policia jep detaje

  • E.K /
  • 20 tetor 2021 - 09:51
Si erdhi deri te sulmi ndaj Xhavit Drenorit, Policia jep detaje

Kandidati për kryetar të Drenasit nga radhët e Iniciativës Qytetare “Green për Drenas”, Xhavit Drenori është sulmuar dje gjatë ditës. Për këtë rast ka dhënë detaje edhe Policia e Kosovës.

Përmes raportit 24 orësh, Policia ka bërë me dije se i dyshuari dhe viktima kanë pranuar tretman mjekësor.

“Gllogoc, 19.10.2021-13:12. Viktima mashkull kosovar ka njoftuar se është takuar me të dyshuarin mashkull kosovar për të biseduar për një rast të mëhershëm. Gjatë bisedës i dyshuari ka sulmuar viktimën. I dyshuari dhe viktima kanë pranuar tretman mjekësor. Me vendim të prokurorit rasti shkon në procedurë të rregullt”, thuhet në raport.

Për këtë rast ka folur dje express edhe vetë Drenori. Ai ka thënë se është sulmuar nga djali i prokurorit Ibrahim Berisha.

 “Po, është e vërtetë që jam sulmuar. Jam sulmuar nga djali i prokurorit Ibrahim Berisha. Jam në stacion, s’mundem me fol më shumë”, ka thënë Drenori.

Drenori disa herë ka përmendur emrin e prokurorit të Themelores në Prishtinë, si pengesë për t’u hetuar pretendimet ndaj kryetarit aktual Ramiz Lladrovci për keqpërdorime në Drenas. Madje ai akuzonte Lladrovcin se ia ka punësuar të renë prokurorit Berisha.

Ndryshe, në zgjedhjet e së dielës në Drenas, Drenori është renditur i katërti. Ai ka marr 4.04 përqind apo 897 vota.

(Kosova Sot Online)