Sveçla: Sot në veri të vendit individë të maskuar kanë sulmuar zyrtarët komunal të zgjedhjeve

  • A.P /
  • 06 December 2022 - 17:54
Sveçla: Sot në veri të vendit individë të maskuar kanë sulmuar zyrtarët komunal të zgjedhjeve

Për ngjarjet e ndodhura sot në Veri të Republikës së Kosovës, ka reaguar ministri i Punëve të Brendshme, Xhelal Sveçla,  transmeton gazeta “Kosova Sot Online”.

Sveçla ka theksuar se sot në veri të vendit individë të maskuar kanë sulmuar zyrtarët komunal të zgjedhjeve dhe zyrtarët policor me shok bomba dhe të shtëna në ajër.

“Policia e Kosovës tashmë ka filluar hetimet për të identifikuar dhe sjellur para drejtësisë të gjithë kriminelët e përfshirë në sulmet e sotme. Policia do të vazhdojë angazhimet sipas mandatit të saj në gjithë Republikën e Kosovës për ofrimin e sigurisë, garantimin e rendit dhe sundimin e ligjit”, ka shkruar Sveçla.

Reagimi i plotë:


 Zgjedhjet janë e drejtë elementare e secilit qytetar në një vend demokratik.

Policia e Kosovës pasi ka pranuar kërkesën e Komisionit Qendror të Zgjedhjeve, sot ka asistuar për funksionalizimin e zyreve të Komisioneve Komunale Zgjedhore në Zubin Potok dhe Mitrovicë e Veriut, me qëllim të vazhdimit të procesit përgatitor për zgjedhjet e jashtëzakonshme komunale të 18 dhjetorit.

Nga grupe të organizuara me disa individë prej tyre të maskuar, Zyrtarët Komunal të Zgjedhjeve dhe zyrtarët policor janë sulmuar me shok bomba dhe të shtëna në ajër, për të ndaluar ushtrimin e detyrës së tyre zyrtare.

Sulme të tilla si ky sot me qëllim të bllokimit të procesit zgjedhor janë të papranueshme. Organizimi i zgjedhjeve është obligim kushtetues ndërsa pjesëmarrja në to është e drejtë e qytetarëve që nuk mund të cënohet nga askush.

Policia e Kosovës tashmë ka filluar hetimet për të identifikuar dhe sjellur para drejtësisë të gjithë kriminelët e përfshirë në sulmet e sotme. Policia do të vazhdojë angazhimet sipas mandatit të saj në gjithë Republikën e Kosovës për ofrimin e sigurisë, garantimin e rendit dhe sundimin e ligjit.


(Kosova Sot Online)