Lexoni edhe:
Krasniqi i kërkon Kurtit të raportojë në Kuvend për gjendjen sigurisë në veri
“Kidnapim, jo arrestim”. Këtë kryeministri Albin Kurti e tha disa herë në një konferencë për media pas mbledhjes së Këshillit të Sigurisë, që u mbajt sot në orën 07:00.
Kurti ka përmendur dy njësite të Serbisë që tha se të mërkurën u futën në territorin e Kosovës për t’i kidnapuar tre policë patrollues kufitar në zonën kufitare të njohur si Bare/Tresav në komunën e Leposaviqit. Me to, ai ka thënë se duhej të merrej KFOR-i, transmeton "Kosova Sot Online".
“Bëhet fjalë për dy formacione të armatosura të Serbisë të cilat kanë hyrë në territorin e Kosovës dhe me të cilët do të duhet të merrej KFOR-i: është njësia speciale antiterroriste, që ata e quajnë Sai, dhe është njësia speciale ushtarake që ata e quajnë Kobra. Pra, Sai dhe Kobra janë njësitë që duket se kanë bërë vëzhgim dhe më pastaj edhe kidnapim”, tha Kurti.
Krasniqi i kërkon Kurtit të raportojë në Kuvend për gjendjen sigurisë në veriLexoni edhe:
Kryeministri tha se ky rast ishte “agrasion ndaj shtetit”.
“…Agresion ndaj shtetit tonë demokratik, hakmarrje ndaj Policisë së Kosovës që po e lufton krimin dhe intencë për eskalim e destabilizim në kohën kur ne tashmë kemi prezantuar planin pesëpikësh të depërshkallëzim, pra deeskalim dhe për normalizim”.
Për këto arsye, Kurti tha se “institucionet tona të rendit dhe sigurisë e kanë rritur nivelin gatishmërisë”.
Ministri i Punëve të Brendshme, Xhelal Sveçla tha se ka pasur më shumë pjesëtarë të këtyre dy njësiteve në aksion, sesa që është parë në fotografi.
“Ky ka qenë një aksion i këtyre dy njësive speciale me numër shumë më të madh sesa që ju keni parë apo sesa që kanë qenë pjesëtarët e Policisë sonë”, tha Sveçla.
Në mbledhjen e Këshillit të Sigurisë së Kosovës, përveç Kurtit dhe ministrit të Punëve të Brendshme, Xhelal Sveçla, morën pjesë edhe zëvendëskryeministri Besnik Bislimi, drejtori i Agjencisë së Kosovës për Inteligjencë, Petrit Ajeti, ministri i Mbrojtjes, Armend Mehaj, e të tjerë.
Tre policë patrollues të kufirit u kidnapuan të mërkurën nga një njësit special i policisë serbe, sipas Policisë së Kosovës, “thellë brenda në territorin e Republikës së Kosovës”. Ata ishin në detyrë, siç u tha, në një pikë statike në vendin e quajtur Tresave/Bare.
Kurti tha dje se dyshojnë se “ata janë rrëmbyer nga ushtria e Serbisë, qartazi si hakmarrje e Serbisë për arrestimin e djeshëm të kriminelit famëkeq Millun Millenkoviq – Lune, i cili paraqet një ndër krerët e krimit të organizuar dhe kontrabandës”. Lune u arrestua të martën në Mitrovicën e Veriut. Sveçla e përshkroi atë si organizator të sulmeve ndaj Policisë së Kosovës, pjesëtarëve të KFOR-it dhe gazetarëve.
(Kosova Sot Online )