Vdes Ian Wilmut, krijuesi i Dolly dhe 'babai' i klonimit

Shkencëtari britanik Ian Wilmut, ekipi i të cilit bëri histori duke qenë i pari që klonoi një gjitar, delen Dolly, ka vdekur në moshën 79-vjeçare, njoftoi sot Universiteti i Edinburgut, ku ai punonte,  transmeton gazeta "Kosova Sot Online".

Dolly ishte gjitari i parë që u klonua duke përdorur një qelizë të rritur, një përparim teknologjik në kërkimin mjekësor. Ian Wilmut udhëhoqi ekipin në Institutin Roslyn, Universiteti i Edinburgut, që klonoi Dolly-n në vitin 1996.

Ky kërkim novator “transformoi të menduarit shkencor në atë kohë,” tha në një deklaratë Peter Matheson, një zyrtar i lartë në universitet.

Wilmut vuante nga sëmundja e Parkinsonit dhe që nga viti 2018 është fokusuar në kërkime rreth këtij çrregullimi degjenerativ të sistemit nervor qendror.

Me metodën e klonimit të përdorur në Dolly, qentë u klonuan në vitin 2005 në Korenë e Jugut dhe majmunët në vitin 2018 në Kinë.

(Kosova Sot Online)