Kurti dhe Kamberi flasin për takimin në Bruksel dhe zhvillimet e fundit në Luginë të Preshevës

Kryeministri i Kosovës, Albin Kurti, ka pritur sot në takim deputetin shqiptar në Parlamentin e Serbisë, Shaip Kamberin, përcjell "Kosova Sot Online".

Kurti në këtë takim ka folur lidhur me takimin e së enjtes në Bruksel, i ciili përfundoi pa ndonjë rezultat, dhe qëndrimin e Qeverisë së Kosovës.

Ndërsa, Kamberi e ka njoftuar Kurtin për zhvillimet e fundit në Luginë të Preshevës.

Në fund thuhet se Kurti e përgëzoi Kamberin për angazhimin dhe vendosmërinë dhe i ofroi mbështetjen e plotë për afirmimin e pozitës së shqiptarëve në Preshevë, Medvegjë dhe Bujanoc.

Njoftimi i plotë:

Kryeministri i Republikës së Kosovës, Albin Kurti, sot në takimin që pati me deputetin shqiptar në Parlamentin e Serbisë, Shaip Kamberi bisedoi lidhur me rrjedhat aktuale politike.

Kryeministri foli për takimin e kësaj jave të nivelit të lartë të dialogut në Bruksel dhe qëndrimin e Qeverisë së Republikës së Kosovës.

Ndërkaq, deputeti Kamberi e njoftoi kryeministrin me zhvillimet e fundit në Luginë të Preshevë. Ai theksoi se bashkë me deputetët boshnjak të SDA ka inicuar pesë projektligjeve ndër të cilat ai për mbrojtjen e të drejtave dhe lirive të pakicave; për selitë dhe territorin e gjykatave; për ndryshimin e ligjit për përdorimin e simboleve kombëtare; për ndryshimin e Rregullorës së parlamentit ashtu që listat e pakicave të kenë mundësinë e krijimit të grupit parlamentar me tre deputet e jo me pesë siç kërkohet për partitë qëndrore, si dhe projektrezolutën për Srebrenicën.

Z. Kamberi theksoi se fatkeqësisht këto iniciativa po pengohen nga kreu i parlamentit të Serbisë duke mos u futur në rend të ditës as edhe për t’u diskutuar.

Kryeministri e përgëzoi deputetin Kamberi për angazhimin dhe vendosmërinë dhe i ofroi mbështetjen e plotë për afirmimin e pozitës së shqiptarëve në Preshevë, Medvegjë dhe Bujanoc.

(Kosova Sot Online)