SHBA del me njoftim për operacionin e evakuimit të amerikanëve nga Izraeli

Shtëpia e Bardhë njoftoi se Qeveria amerikane do të nisë operimin e fluturimeve për evakuimin e amerikanëve që duan të largohen nga Izraeli, përderisa Izraeli ka paralajmëruar se po përgatitet të përshkallëzojë aksionin hakmarrës ndaj militantëve palestinezë të Hamasit në Rripin e Gazës.

Fluturimet nga Izraeli, me amerikanët që duan të largohen, pritet të nisin të premten, tha zëdhënësi i Këshillit të Sigurisë Kombëtare të Shtëpisë së Bardhë, John Kirby.

Qeveria amerikane është përgatitur që të realizojë të paktën katër fluturime në ditë nga Izraeli për në Frankfurt, Gjermani, thanë burimet e afërta me këtë çështje për agjencinë Associated Press.

Ky njoftim vjen në kohën kur Shtëpia e Bardhë tha se numri i amerikanëve të vrarë gjatë dhunës mes Izraelit dhe Hamasit tashmë ka arritur në 27.

(Kosova Sot Online)