Lexoni edhe:
Hidhet poshtë pretendimi i Trumpit për imunitet, ja se çfarë pritet të ndodhë tani
Edhe një tjetër kishë, atraksion i njohur turistik në Stamboll po kthehet në xhami
Pas Hagia Sofisë, një tjetër kishë bizantine në Stamboll, e cila funksionoi si muze për 79 vjet, u kthye në xhami, ytransmeton "Kosova Sot Online".
Sipas gazetës “Yeni Safak”, Kisha e Krishtit Shpëtimtar në Polje (Xhamia Karia), e njohur edhe si Kori, do të hapë portat e saj më 23 shkurt si xhami ku do të falet të premteve.
Edhe pse presidenti turk Rexhep Tajip Erdogan mori një vendim për ta kthyer muzeun në xhami në vitin 2020, ky vendim u ndërpre për shkak të disa punimeve restauruese.
Gazeta turke tani raporton se ka përfunduar rinovimi afatgjatë i xhamisë Karija, pra Kishës së Krishtit Shpëtimtar në Polje.
Vendi historik i adhurimit, i pajisur me qilima të kuq të projektuar posaçërisht, është planifikuar të hapet për publikun të premten, më 23 shkurt. Theksohet se gjatë restaurimit janë ruajtur mozaikët dhe afresket unike.
Ish-Kisha e Krishtit Shpëtimtar në Polje ndodhet në veriperëndim të bërthamës historike të Stambollit dhe është atraksioni turistik më i vizituar nga periudha bizantine, së bashku me Hagia Sophia dhe Cisternën e Bazilikës.
Emri i zakonshëm i kishës është thjesht Hora, që do të thoshte se kisha ishte në një fushë, domethënë jashtë mureve të qytetit. Origjina e emrit lidhet me kohën e ndërtimit të tij në fillim të shekullit të pestë, kur ndodhej jashtë mureve të qytetit. Edhe pse më vonë u gjend brenda qytetit, ai e mbajti emrin e vjetër.
Krahas këtij emri, përdoret edhe termi Karija, i cili përfaqëson emrin osman të xhamisë në të cilën u shndërrua kisha në fillim të shekullit të 16-të.
Kisha mori formën e saj të sotme në fillim të shekullit të 14-të, kur u rinovua plotësisht nga drejtuesi bizantin Theodore Metohitos. Gjatë rrethimit të Kostandinopojës në 1453, një ikonë u soll në kishë, e cila u konsiderua si mrekulli dhe mbrojtëse e qytetit për të marrë ndihmën hyjnore në mbrojtje kundër të pafeve.
Megjithatë, osmanët e pushtuan qytetin dhe gjysmë shekulli pas kësaj, kisha u shndërrua në një xhami të quajtur Kariye me urdhër të Atik Ali Pashës, vezirit të madh të Sulltan Bajazitit II. Brendësia e saj ishte përshtatur me nevojat e Islamit, kështu që mozaikët dhe afresket u mbuluan me një shtresë suvaje.
Ndërtesa u shkatërrua me kalimin e kohës dhe gjatë hulumtimit të brendshëm të saj në vitin 1948, bizantologët amerikanë zbuluan ikona dhe mozaikë bizantine nën shtresën e suvasë, pas së cilës filloi një restaurim i detajuar i ndërtesës dhe zbulimi i shtresës origjinale.
Punimet zgjatën për një dekadë të tërë dhe në vitin 1958 u hap për publikun si një muze i quajtur zyrtarisht Kariye sipas emrit të xhamisë, megjithëse emri Hora është ende i vendosur mes banorëve të Stambollit.
(Kosova Sot Online )
