Ja pse Orban ka akuzuar liderët e Bashkimit Evropian

Kryeministri hungarez, Viktor Orban, ka akuzuar liderët e Bashkimit Evropian se po marrin një rol gjithnjë e më aktiv në konfliktin në Ukrainë, diçka që ai parashikoi se do të ishte një çështje kyçe në zgjedhjet e BE-së këtë verë, transmeton gazeta “Kosova Sot Online”.

Duke folur në një intervistë me radion publike hungareze nga Brukseli të premten, Orban ka thënë se “udhëheqësit flasin sikur po bëjnë luftën e tyre kundër Rusisë. Jo si ne që themi, ‘Shiko, kjo është një luftë midis Rusisë dhe Ukrainës. Kjo nuk është lufta jonë”.

Hungaria refuzoi të mbështesë një përpjekje të udhëhequr nga Çekia për të blerë municionin për të cilin Ukraina ka nevojë..

Kryeministri populist i Hungarisë ka uruar ndërkohë presidentin rus, Vladimir Putin për fitoren e tij në zgjedhjet që u kritikuan nga shumica e liderëve perëndimorë si as të lira dhe as të drejta.

Udhëheqësi hungarez ishte i vetmi kryetar i një vendi të Bashkimit Evropian që uroi Putinin për rizgjedhjen e tij, i cili do të zgjasë sundimin e tij gati çerek shekullor në Rusi me gjashtë vjet të tjera.

Qeveria e Orbanit ka marrë një qasje të ndryshme ndaj luftës në Ukrainë nga aleatët e saj në BE dhe NATO, që kur Rusia filloi pushtimin e saj në shkallë të plotë më shumë se dy vjet më parë.

(Kosova Sot Online)