Ukraina: Me dronë shkatërruam gjashtë avionë rusë

Ukraina ka kryer një sulm me dron kundër objektivave në Rusinë jugore dhe pretendon se ka shkatërruar gjashtë avionë rusë në një bazë ajrore në rajonin e Rostovit, transmeton gazeta “Kosova Sot Online”.

Burime të sigurisë thanë për BBC Ukrainian se tetë avionë të tjerë u dëmtuan rëndë dhe 20 veta nga personeli i shërbimit mund të ishin vrarë ose plagosur.

Baza e Morozovsk ka avionë Su-27 dhe Su-34 të përdorur në vijën e frontit në Ukrainë, thanë burimet.

Nuk ka pasë asnjë komentim nga Rusia mbi njoftimet për një sulm në aeroport.

BBC, që raportoi lajmin, thotë se nuk ka qenë në gjendje të verifikojë në mënyrë të pavarur raportet.

Megjithatë, zyrtarët rusë thanë se më shumë se 40 dronë ishin drejtuar në rajonin, i cili kufizohet me Ukrainën.

Analisti ushtarak rus i BBC-së, Pavel Aksyonov, thotë se një sulm nga kaq shumë dronë në një hapësirë të shkurtër kohore mund të kishte mposhtur mbrojtjen ajrore.

Ministria ruse e mbrojtjes tha se rajonet Saratov, Kursk, Belgorod dhe Krasnodar ishin gjithashtu në shënjestër.

Në rrethin Morozovsk të Rostovit, një nënstacion elektrik u godit, duke lënë rreth 600 njerëz pa energji për disa orë, tha guvernatori i Rostovit Vasily Golubev në kanalin e tij Telegram.

Ai shtoi se ka pasur disa dëmtime në një ndërtesë banimi 16-katësh.

Në një postim të mëvonshëm, ai tha se tetë persona ishin plagosur nga eksplozivi që shpërtheu në një nga dronët e rënë gjatë një hetimi në vendin “jo larg nga aerodromi”.

Ukraina ka shtuar sulmet me dronë ndaj objektivave brenda Rusisë kohët e fundit, duke synuar objektet ushtarake dhe energjetike.

Ajo ka paralajmëruar në mënyrë të përsëritur se ushtria e saj po përballet me mungesa të mëdha municionesh, por ka vendosur si objektiv prodhimin e një milion drone brenda vendit këtë vit.

(Kosova Sot Online)