Pacolli: PDK, LDK, AAK e Lista Serbe janë një koalicion
Fitore Pacolli, deputete e Vetëvendosjes, ka komentuar deklaratën e Partisë Demokratike të Kosovës pas takimit të mbajtur nga krerët e kësaj partie, në të cilën u shpreh gatishmëria për dialog, ndërkohë që ajo vlerëson se qeveria e re duhet të vijë nga opozita e djeshme, transmeton gazeta “Kosova Sot Online”.
Sipas Fitore Pacollit, kjo do të thotë se PDK, LDK, AAK dhe Lista Serbe janë në një koalicion.
"Komunikata e PDK-së nënkupton një koalicion – PDK, LDK, AAK dhe Lista Serbe janë një koalicion që dëshiron të udhëheqë qeverinë në të ardhmen. Flasin për një qeveri demokratike, por me kërkesën e tyre që qeveria të formohet nga forcat opozitare, po e minojnë procesin demokratik", ka vlerësuar ajo.
Pacolli tha se demokracia nuk mund të mbrohet duke përmbysur vullnetin e qytetarëve. "Cili është qëllimi i zgjedhjeve?" – ka pyetur ajo më tej. "Nëse këto parti politike refuzojnë të pranojnë të drejtën që kushtetuta na jep neve si parti fituese, atëherë ata po e minojnë procesin demokratik", tha deputetja e Vetëvendosjes.
Pacolli tha se zgjedhja e kryetarit të Kuvendit nuk është një çështje që duhet të diskutohet mes partive në takim, sepse është një e drejtë që nuk mund të kontestohet nga askush, pasi i përket vetëm partisë fituese.
"Nuk mund të ketë konsensus për emrin e kryetarit të Kuvendit, sepse kjo i takon vetëm partisë fituese. LVV është përpjekur të gjejë zgjidhje, kemi propozuar një formë të re të votimit për të liruar disa deputetë që janë nën presion, në mënyrë që kryetari të zgjidhet përmes votimit të fshehtë", tha ajo.
Pacolli tha se kjo formë votimi u jep deputetëve të drejtën të shprehen lirshëm. Ajo shtoi se nuk është shkruar askund se nuk lejohet të ndryshohet mënyra e votimit ndërkohë. "Nëse nuk guxon ta ndryshosh mënyrën e votimit, pse guxon ta ndryshosh kandidatin?", pyeti ajo.
(Kosova Sot Online)
