Starmer: Marrëdhënia me Kinën është në një gjendje të mirë

Sir Keir Starmer ka deklaruar se pati një “takim shumë të mirë dhe konstruktiv” me homologun e tij kinez dhe se kjo do të çojë në një “forcim të marrëdhënies”.

Kryeministri ka dhënë reagimin e tij të parë pas takimit kyç me presidentin kinez Xi Jinping.

Kryeministri u tha mediave: “Bëmë përparim vërtet të mirë. Pra, për tarifat për uiskin, për udhëtimin pa viza drejt Kinës dhe për shkëmbimin e informacionit dhe bashkëpunimin mbi migracionin e parregullt, me fokus të veçantë te varkat e vogla dhe pjesët e motorëve.’, raporton Sky News.

Ai shtoi: “Kemi rënë dakord që, për tarifat e uiskit, të shohim se si do të reduktohen dhe cili do të jetë afati kohor.

“[Sa i përket] udhëtimit pa viza, sa larg, në çfarë mase dhe kur mund të fillojë.

“Dhe për shkëmbimin e informacionit mbi varkat e vogla, bashkëpunimin që na nevojitet, brenda një dialogu, në fakt, për një fokus strategjik më të madh mbi sigurinë dhe mbrojtjen.

“Pra, një takim shumë i mirë dhe konstruktiv, me rezultate konkrete.

“Marrëdhënia është në një gjendje të mirë, një gjendje të fortë,” shtoi ai.

I pyetur për reagimin e tij ndaj atyre në Mbretërinë e Bashkuar që mund të ndihen të parehatshëm nga një marrëdhënie e ngushtë e kryeministrit me Kinën, ai u përgjigj: “Ajo që u them të gjithëve këtu është se unë gjithmonë veproj në interesin tonë kombëtar.

“E di që, çfarëdo që po ndodh në botë, gjëja më e rëndësishme për shumicën dërrmuese të njerëzve është kostoja e jetesës.

“Prandaj, hapja e aksesit në mundësi biznesi, shfrytëzimi i atyre mundësive që më pas reflektohen në biznese më të mira, në vende pune dhe në ulje çmimesh brenda vendit, kanë vërtet shumë rëndësi. Dhe kështu, bëmë përparim real në të gjitha këto fusha.”

Të drejtat e njeriut dhe Jimmy Lai

Ai u pyet gjithashtu nëse kishte prekur tema të tilla si të drejtat e njeriut, trajtimi i ujgurëve dhe aktivisti britanik pro-demokracisë Jimmy Lai – i cili ndodhet në burg që nga viti 2020.

Starmer u përgjigj: “Po, ne i ngritëm këto çështje, ashtu siç do të prisnit.

“Një pjesë e arsyes për angazhimin është të sigurohemi që të mund të shfrytëzojmë të dyja palët mundësitë që janë në dispozicion, gjë që e kemi bërë, por edhe të zhvillojmë një diskutim të pjekur për çështjet për të cilat nuk biem dakord.”

I pyetur nëse delegacioni kinez po dëgjonte, Starmer këmbënguli se kishte pasur një “diskutim të respektueshëm” mbi këtë.

(Kosova Sot Online)