Lexoni edhe:
Studimi i fundit siguron të dhëna: Çfarë do të ndodhë kur të shuhet dielli?
NASA nis mision për asteroidët e Jupiterit, Kosova ende merret me qen endacakë
Agjencia amerikane për kërkime hapësinore, NASA, pritet që të shtunën ta nisë misionin e parë të llojit të vet, të quajtur “Lucy”, për t’i studiuar asteroidët “Trojan” të planetit Jupiter. Shkencëtarët besojnë se këta gurë të mëdhenj janë mbetje e materialit të lashtë, nga i cili janë formuar planetet e jashtme të Sistemit Diellor. Ndërkohë në Kosovë, për çdo vit në prag të periudhës dimërore, riaktualizohet tema e qenve endacakë.
Sonda e vendosur në një kapsulë të posaçme pritet të ngrihet nga sipërfaqja e planetit tonë nga stacioni ajror “Cape Canaveral” në Florida në orën 5 e 34 minuta sipas kohës lokale, e bartur përmes raketës “Atlas V”, që është prodhuar si pjesë e bashkëpunimit të kompanive gjigante, “Boeing Co” dhe “Lockheed Martin Corp”.
Nëse gjithçka zhvillohet sipas planit, “Lucy” do të endet nëpër hapësirë në një ekspeditë 12-vjeçare për të studiuar një numër rekord të asteroidëve. Kjo sondë do të jetë e para që do të përdoret për eksplorimin e asteroidëve “Trojan”, që paraqesin mijëra objekte gurore, të cilat kryejnë orbitë rreth Diellit në dy tufa – një para rrugës së Jupiterit dhe një tjetër pas tij.
Asteroidët më të mëdhenj “Trojan”, të emëruar sipas mitologjisë greke, besohet se kanë diametër deri në 225 kilometra, shkruan Reuters, transmeton Gazeta Express.
Shkencëtarët shpresojnë që fluturimi i sondës afër shtatë asteroidëve të tillë do të sigurojë të dhëna të reja për atë se si janë formuar planetët e Sistemit Diellor para rreth 4.5 miliardë viteve dhe çfarë ua ka dhënë formën që e kanë tash.
Pasi besohet se janë të pasur me komponime të karbonit, asteroidët gjithashtu mund të ofrojnë pikëpamje të reja rreth prejardhjes së materialeve organike dhe jetës në Tokë, tha NASA.
Përderisa shkencëtarët në Shtetet e Bashkuara merren me asteroidët e Jupiterit, në Kosovë ka halle tjera. Qeveria e Republikës së Kosovës ka ndarë miliona euro për Agjencinë e Ushqimit dhe Veterinarisë që të angazhohen për trajtimin dhe strehimin e qenve endacakë. Por që këta të fundit ende po fajësojnë nivelin lokal sepse sipas tyre kjo është kompetencë e komunave.
Qytetarët janë më të rrezikuarit nga numri i madh i qenve endacakë. Ata thonë se në vazhdimësi janë të rrezikuar nga qentë të cilët dita-ditës po bëhen më të rrezikshëm. Ata bëjnë përgjegjës Komunën e Prishtinës dhe AUV-in për mostrajtim të duhur ndaj kësaj problematike.
(Kosova Sot Online)
