Receta e Cekës: Kifle

PËRBËRËSIT:
1/2 kg miell,
1/4 lit qumësht,
1 qeskë maja,
2 lugë sheqer,
pak kripë,
1 sheqer vanileje,
2 vezë,
1/2 qeskë pluhur paste,
2 lugë vaj,
2 lugë margarinë.
Në qumësht të vakët me një lugë miell dhe pak sheqer,
derdhet maja dhe vendoset në vend të ngrohtë gjersa
të vijë. Në masën e miellit të përzier me pluhur paste,
qiten maja e ardhur, 1 vezë e tundur, 2 lugë sheqer, një
sheqer vanilje, pak kripë dhe 2 lugë vaj. Në tavolinë të
përmillur ngjeshen përbërësit mirë, gjersa të fitohet një
brumë i butë dhe i lëmuar. Pasi të ngjeshet mirë,
brumi duhet të qëndrojë në vend të vakët gjersa të
dyfishohet masa. Brumi i ardhur ndahet në 4 kuleç,
tëhollohen në madhësi pjate dhe priten në 8 pjesë. Çdo
pjesë lyhet me vaj, qitet nga një lugë djathë i troshitur
i përzier me të bardhë veze dhe mbështillen kiflet të
cilat palosen në tepsi të lyer me yndyrë. Mbi lyhen me
të verdhë veze dhe u hidhet susam. Mbi çdo kifle vihet
nga një copëz margarine. Posa të kyçet furra në temperaturë
180 gradë C, futen në furrë për t’u pjekur gjersa
të skuqen.

(Kosova Sot)