KAS vendos pas një muaji se a do ta lejojë Skënderbeun të luajë në Evropë apo jo

Skënderbeu do ta mësojë përfundimisht nëse do të mund të luajë sezonin e ardhshëm në Kupat e Europës vetëm pasi të përfundojë kampionati. 

Seanca ku Skënderbeu prezantoi të gjithë mbrojtjen e tij ndaj dënimit për manipulimin e rezultateve zgjati plot 8 orë në selinë e CAS-it në Lozanë, por skuadra korçare doli optimiste nga gjyqi i tejzgjatur.

Avokatët që përfaqësuan ekipin shqiptar renditën faktet, që sipas tyre rrëzojnë akuzën, ndërsa kërkuan pafajësi dhe jo ulje të dënimit.

Nëse kjo merret parasysh do të kërkohet dëmshpërblim i majmë nga ana e Skënderbeut për dëmin sportiv dhe financiar.

Pas 4 javësh zbardhet vendimi, për seancën e zhvilluar këtë të martë në Gjykatën e Arbitrazhit Sportiv, por Skënderbeu, që pretendon pafajësi që në nisjen e këtij skandali, shpreson se CAS do të rikthejë në vend imazhin dhe dëmin e madh ndaj ekipit korçar.

(Kosova Sot)