Ndryshimet e propozuara nga UEFA për Ligën e Kampionëve i rrezikojnë klubet angleze

UEFA po planifikon ndryshime të mëdha në formatin aktual të garës më prestigjioze të Evropës, Ligës së Kampionëve.

Liga e Kampionëve është turneu më i famshëm i futbollit të klubeve në botë dhe kjo garë sjell një shumë të madhe parash. Për t’i rritur edhe më shumë përfitimet, UEFA dëshiron t’i bëjë grupet me nga 14 ndeshje e jo gjashtë siç është tani, raporton The Sun.

Shtëpia e futbollit evropian gjithashtu dëshiron ta shtojë edhe një garë të tretë evropiane, pas Ligës së Kampionëve dhe Ligës së Evropës, duke e rritur kështu numrin e ndeshjeve kontinentale nga 407 në 647.

Plani – i drejtuar nga kryesuesi i Juventusit, Andrea Agnelli – do të ofronte më shumë mundësi për përfitime nga sponsorët dhe transmetuesit televiziv.

Mirëpo, një ndryshim i tillë do ta rrezikonte mjaft shumë kupën e dytë të Anglisë, League Cup. Premierliga ka insistuar t’i mbajë 20 klube në ligë dhe Shoqata e Klubeve Evropiane (ECA) e ka tërhequr kërkesën që ndeshjet ekstra të zhvillohen në fundjavë.

Kjo do të thotë se mënyra e vetme që klubet angleze të mund ta përballojnë orarin e ndeshjeve do të ishte nëse tërhiqen nga League Cup, ose nëse luajnë vetëm me lojtarë të rinj të akademisë në këtë garë.

UEFA dhe ECA janë të vetëdijshëm se pa mbështetjen e klubeve më të mëdha të Premierligës, propozimet e tyre për ta ndryshuar formatin e garave evropiane që nga viti 2024 nuk do të ishte i suksesshëm.

Por, nëse klubet angleze tundohen nga përfitimet financiare që UEFA dhe ECA mund t’ua ofrojë, atëherë lufta për ta shpëtuar League Cup mund të përfundojë e pasuksesshme. 

(Kosova Sot Online)