Ruiz Jr synon ta pensionojë nga boksi Joshuan
Andy Ruiz Jr beson se Anthony Joshua mund të tërhiqet nga boksi përkohësisht nëse e humb edhe rimeçin ndaj tij në fund të këtij viti.
Boksieri meksikan ia mori titujt e botës Joshuas pas triumfit tronditës në meçin e qershorit. Ata do të takohen përsëri në ring më 7 dhjetor në Arabinë Saudite.
Ylli britanik e shfrytëzoi menjëherë opsionin për rimeç në marrëveshjen me Ruiz Jr, por ky i fundit planifikon t’ia shkaktojë humbjen e dytë radhazi dhe në total në karrierë Joshuas.
“Mendoj se ai duhet të pushojë nga boksi paksa, nëse e rreh përsëri”, tha Ruiz Jr për Sky Sports.
“Le ta rimarrë veten, por një apo dy humbje nuk do ta bëjnë dallimin. Ai vazhdon të jetë luftëtar, jam i sigurt se do të rikthehet”, shtoi Ruiz Jr.
(Kosova Sot Online)