NBA: Fitojnë Oklahoma dhe Angeles Lakers
Vjen fitorja e parë sezonale në NBA për Oklahoma City Thunder, që mposhtën thellë 120-92 Golden State Warriors. Një rezultat që certifikon nisjen shumë të keqe të sezonit nga skuadra e Steve Kerr, e cila duket shumë larg formës së viteve të fundit, ku ka siguruar 5 finale radhazi. Lamtumira e Durant dhe dëmtimi i Thompson janë vetëm disa nga arsyet e krizës, por përceptimi është që Golden State duhet të mendojë për një cikël krejt të ri dhe rruga për ta bërë duket shumë e gjatë.
23 pikë shënoi Stephen Curry për Warriors, ndërsa në radhët e Thunder 5 basketbollistë realizuan 10 ose më shumë pikë (më i miri Schroder me 22 pikë).
Koleksionuan fitoren e dytë Los Angeles Lakers, që iu imponuan 120-101 Charlotte Hornets. Një ndeshje e fituar në periodën e katërt nga të zotët e shtëpisë, pasi shënuan një rezultat të pjesshëm 33-21. Funksionon gjithnjë e më mirë dyshja LeBron James-Anthony Davis. I pari e mbylli me 20 pikë e 12 asiste, ndërsa i dyti me “double-double”, 29 pikë e 14 “rebound”.
Humbin sërish me vetëm një pikë diferencë në kohën shtesë Brooklyn Nets, që këtë radhë u dorëzuan mes zhgënjimit 134-133 ndaj Memphis Grizzlies, falë një trepikëshi të pabesueshëm të Jae Crowder para se të binte sirena për përfundimin e takimit. Superparaqitje në radhët e Grizzlies nga Ja Morant (30 pikë e 9 asiste). Për Nets nuk mjaftuan 37 pikët, 7 asistet dhe 7 “rebound” të Kyrie Irving.
121-119 fituan Portland Trail Blazerz ndaj Dallas Mavericks, falë CJ McCollum (35 pikë) e Damian Lillard (28 pikë), ndërsa për Dallasin Luka Doncic për pak realizoi “triple-double”, duke e mbyllur takimin me 29 pikë, 12 “rebound” dhe 9 asiste.
Në sfidën e fundit të mbrëmjes, Miami Heat u dorëzuan ndaj Minnesota Timberwolves 116-109, që siguruan suksesin e tretë radhazi në po kaq ndeshje.
Rezultatet:
Oklahoma City Thunder – Golden State Warriors 120-92
Memphis Grizzlies – Brooklyn Nets 134-133
Dallas Mavericks – Portland Trail Blazers 119-121
Minnesota Timberwolves – Miami Heat 116-109
Los Angeles Lakers – Charlotte Hornets 120-101
(Kosova Sot Online)
