FSHF: Kualifikimi në “Euro 2024” nuk është rastësi

Federata Shqiptare e Futbollit (FSHF) vlerëson se kualifikimi i Kombëtares në “Euro 2024” nuk është një rastësi, pasi ky objektiv ishte shpallur që në shpalosjen e strategjisë së FSHF-së, “Futbolli për Kombin 2022-2025”.

Kreu i qeverisë së futbollit shqiptar, Armand Duka, e kishte shprehur hapur që në prezantimin e strategjisë: “Jemi besimplotë që mund të kualifikohemi. E bëmë në vitin 2016, do e bëjmë sërish”.

Duka qëndroi në të njëjtën linjë edhe pas hedhjes së shortit, pavarësisht se në grup shihen si favoritët kryesorë Polonia dhe Çekia.

“Në grupin tonë mund të luhen ndeshjet dhe mund të bësh çdo rezultat. Është real objektivi për të qenë pjesë e Euro 2024. Kur kemi marrë shortin për Euro 2016, menduam se ishte i pakalueshëm, por ia dolëm”, deklaronte presidenti i FSHF-së.

(Kosova Sot Online)