Kanë kaluar një muaj që nga rikthimi i Raphinhës

Kanë kaluar një muaj që nga rikthimi i Raphinhës në aksion dhe Barcelona është shumë mirënjohëse që e ka sërish në dispozicion. Në pesë ndeshje si titullar që nga kthimi i tij, 29-vjeçari ka shënuar katër gola dhe ka dhënë një asist, ndërsa realizoi edhe në fitoren e së dielës ndaj Villarrealit, që luajti me 10 lojtarë.

Para rikthimit të tij në nëntor, Raphinha kishte munguar pothuajse dy muaj për shkak të dy dëmtimeve radhazi në muskujt e kofshës së pasme. I pari ndodhi gjatë fitores së Barcelonës ndaj Real Oviedos në shtator, në të njëjtën javë kur u mbajt ceremonia e Topit të Artë 2025.

Sipas Cadena SER, gazetari Sique Rodríguez zbuloi se disa zyrtarë të Barcelonës besojnë se dëmtimi i parë i Raphinhës u shkaktua nga stresi i ceremonisë së Topit të Artë në Paris, ku braziliani u rendit i pesti.

“Në klub ka nga ata që ia atribuojnë një prej dëmtimeve të këtij sezoni disa faktorëve. Mes tyre edhe Topin e Artë dhe ditët pas tij. Sepse ai priste të ishte në tre vendet e para dhe përfundoi i pesti. Ka njerëz brenda klubit që ia atribuojnë atë dëmtim stresit të gjithë asaj jave.”

Fillimisht, ky dëmtim duhej ta mbante Raphinhën jashtë fushave për vetëm tre javë, por për shkak se rikuperimi i tij u përshpejtua për përballjen e El Clasicos në tetor, ai pësoi një rikthim të dëmtimit, që e la jashtë fushave edhe për një muaj tjetër. Për këtë, si dhe për dëmtimin fillestar në shtator, përgjegjësinë e mori vetë lojtari.

Ky zbulim për dëmtimin e Raphinhës në tetor vjen pasi ai u la në mënyrë befasuese jashtë formacionit më të mirë në botë të FIFA The Best javën e kaluar. Pavarësisht se ishte bashkë-golashënuesi më i mirë dhe asistuesi kryesor në Ligën e Kampionëve sezonin e kaluar, ai u injorua, gjë që shkaktoi zemërim të madh te trajneri i Barcelonës, Hansi Flick, gjatë konferencës së tij për shtyp para ndeshjes në fundjavë.

(Kosova Sot Online)