Raporti sekret/ Feçor Shehu nxori emrat: Studentët tanë jashtë me femra dhe materiale dekadente - Dossier - Kosova Sot
Raporti sekret/ Feçor Shehu nxori emrat: Studentët tanë jashtë me femra dhe materiale dekadente

Raporti sekret/ Feçor Shehu nxori emrat: Studentët tanë jashtë me femra dhe materiale dekadente

Nga Dashnor Kaloçi,

Publikohet raporti sekret i vitit 1973 i zv- ministrit të Punëve të Brendëshme, Feçorr Shehu, dërguar Hysni Kapos, për jetesën e sjelljet e studentëve tanë jashtë.

Bisedat, takimet, marrëdhëniet dhe shoqëria me shtetas të huaj në Shqipërinë komuniste të para viteve ’90-të, përbënte një herezi dhe ata që e guxonin një gjë të tillë, e paguanin shtrenjtë. Kjo gjë vlente edhe për ata shqiptarë që u jepej mundësia për të dalë jashtë me punë, shërbime, specializime si dhe sportistëve e artistëve.

Nga ky rregull strikt nuk shpëtonin as studentët shqiptarë që u jepej mundësia të shkolloheshin e diplomoheshin në disa universitete të huaja, me të cilat Tirana zyrtare kishte lidhur marrëveshje. Ndryshe nga bashkëmoshatarët e tyre të cilët deri në fundin e viteve ’50-të studjuan në vëndet e Evropës Lindore si: Bashkimi Sovjetik, Poloni, Hungari, Çekosllavaki, Gjermania Lindore etj, të cilët vetë shteti shqiptar i nxiste të lidheshin me vajza të huaja dhe krijonin familje, pas vitit 1960, kjo gjë ishte “mollë e ndaluar”.

Tashmë për të tilla lidhje as që mund të çohej nëpërmënd dhe studentët shqiptarë që studjonin jashtë, ishin nën një survejim të rreptë të organeve të Zbulimit Shqiptar që ishin atashuar nëpër ambasadat tona në vënde të ndryshme të botës. Të cilat herë pas here hartonin raporte dhe informacione, të cilat bëheshin në dy kopje dhe ia përcillnin më pas eprorve të tyre në Tiranë, një në rrugë zyrtare titullarëve të Ministrisë së Brendëshme dhe njënë rrugë partie për Sekretarin e Komitetit Qëndror të PPSH-së që mbulonte organet e Diktaturës së Proletariatit.

Një raport i tillë është edhe ky që po publikojmë më poshtë në këtë shkrim, ku zv/Ministri i Punëve të Brendëshme Feçorr Shehu, i raporton Sekretarit të Komitetit Qëndror të PPSH-së, Hysni Kapo, “Mbi qëndrimin e disa studentëve shqiptarë në Francë”. Raporti sekret është hartuar fillimisht nga Drejtori i Drejtorisë së Zbulimit me Jashtë të asaj kohe(Jonuz Mersini), për eprorët e tij më të lartë në Ministrinë e Brendëshme dhe zv/ Ministri Feçorr Shehu, ia ka drejtuar atë Hysni Kapos, i cili ka vënë shënimet përkatëse aty me shkrimin e tij, duke propozuar edhe kthimin në atdhe të atyre studentëve që manifestonin shfaqje të tilla. Ashtu siç do të shikojmë në raport informacionin në fjalë, rezulton se studentët shqiptarë që ishin asokohe në Francë, jo vetëm që survejoheshin në çdo hap dhe veprim që bënin, por atyre iu kontrollohej edhe korespodenca me letra që ata komunikonin më familjarët e miqtë e tyre në Shqipëri.

REPUBLIKA POPULLORE E SHQIPERISE “Sekret”

MINISTRIA E PUNEVE TE BRENDESHME Ekzempl. Nr 1

DREJTORIA E I-rë Tiranë, më 8.9.1973

Nr. 4399. Prot.

LANDA: Mbi qëndrimin e disa studentëve shqiptarë në Francë

SEKRETARIT TE KOMITETIT QENDROR TE PPSH

SHOKUT HYSNI KAPO

TIRANE

Në bazë të marrëveshjes kulturale, nga vëndi ynë, janë dërguar për studime të larta në Francë një numër studentësh.

Gjatë kohës së qëndrimit atje, shokët e ambasadës së Parisit janë përpjekur për t’i mbajtur afër dhe për t’i mbrojtuar nga tentativat e mundëshme të zbulimeve të ndryshme e për ruajtjen pastër të figurës morale të tyre. Por megjith këtë, nga të dhënat e zbulimit, rezulton se disa student bëjnë jetë jo normale dhe kanë krijuar një afinitet të madh me disa persona vëndas ose të huaj të ardhur në Francë. Kështu pa dijeninë e

ambasadës, ata kanë krijuar marrëdhënie me persona të ndryshëm francezë, englezë, etj, me të cilët organizojnë ekskursione jashtë qytetit, i janë përshtatur modës e imitojnë mënyrën e jetesës franceze, studjojnë materiale të ndryshme dekadente e pornografike, gjë e cila duket edhe në sjelljen me vehte gjatë pushimeve të tanishme verore, të materialeve të tilla jo dinjitoze. Për këtë çështje bien në sy shumë student.

1. Kadri…., nga qyteti i Gjirokastrës, i shtresës së varfër, babai me gjëndje punëtor, me qëndrim të mirë gjatë luftës dhe pas çlirimit. Vetë Kadriu ka mbaruar shkollën e mesme të Gjuhëve të Huaja në Tiranë dhe është dalluar si nxënës aktivist i organizatës së rinisë në shkollë.

Gjatë kohës së qëndrimit në Francë, Kadriu ka shoqëri me një student engleze që studion në Paris dhe kohët e fundit punon në Radio-Londra, me të cilën mban korespodencë.

2. Vladimir…… nxënës në Berat, me përbërje të mirë politike, por në letrat që i shkruan një shokut të tij në Shqipëri, i thotë, për arsye se mban flokët e gjatë, nuk shkon në ambasadë, se njihet me dy francze me të cilat bën shëtitje me makina dhe shkon për dreka dhe për darka.

3. Astrit……., nga Dibra, me prejardhje të mirë, mbaruar shkollën e gjuhëve të huaja, me rezultate të mira, mban korrespodencë me anglezen Katerina Doris dhe me një vajzë tjetër në Francë. Vitin e kaluar, kur ishte me pushime në Shqipëri, ka marrë sende nga një person këtu, për t’ja dhënë t’arratisurit Sabaudin Dino, me banim në Francë.

Duke marrë parasysh se veprimtaria armiqësore kundër vëndit tonë në disa drejtime është rritur, mendojmë se ndoshta është e nevojshme që puna për edukimin e mbrotjen e studentëve tanë jashtë shtetit duhet të bëhet më e organizuar dhe më intensive si nga ambasadat tona, ashtu dhe nga Ministria e Arsimit, në rastet kur studentët tanë kthehen me pushime verore ose kur aprovohet e drejta e studimit jashtë.

ZV. MINISTRI I PUNËVE TE BRENDESHME

(FEÇORR SHEHU)

(Kosova Sot)

6 orë e 56 minuta më parë
17/10/18