Editoriali: Pushteti është më helmues se ajri! - Editoriali - Kosova Sot
Editoriali: Pushteti është më helmues se ajri!

Editoriali: Pushteti është më helmues se ajri!

Rritja alarmante e shkallës së ndotjes së ajrit në Prishtinë ka vënë në lëvizje struktura e pushtetit lokal dhe atij qendror, të cilat kanë paralajmëruar në mënyrë të paqartë disa masa konkrete, njëra prej të cilave është edhe ndalimi i hyrjes në Prishtinë të mijëra veturave. Ndërkohë, Kuvendi ka ftuar një seancë të jashtëzakonshme për të debatuar në lidhje me situatën tashmë kritike, nëse kemi parasysh edhe rekomandimet e Institutit Kombëtar të Shëndetit Publik, që të mos hapen dritaret dhe të vendosen maskat! Institucionet duhet të jenë transparente në shpjegimet e tyre për ndotësit që e kanë sjellë kryeqytetin dhe Kosovën në këtë gjendje të rrezikshme. Së pari, kur flitet për veturat, duhet të bëhet e qartë se vetëm vitin e kaluar dhjetëra mijëra vetura të vjetra mbushën vendin tonë, duke shtuar kështu potencialin ndotës. Edhe pse formalisht, kur zhdoganohet një veturë, duhet të plotësohet standardi mjedisor i djegies së karburantit sipas parametrave të BE-së, një gjë e tillë nuk përfillet kurrë. Nga ana tjetër, kur automjetet kalojnë kontrollin teknik, kjo bëhet sa për sy e faqe, ndërsa lejohet që në trafik të dalin vetura që kalojnë shumëfish kufizimet e lejuara të ndotjes së ajrit. Nga ana tjetër, shteti sikur po mundohet ta anashkalojë faktin se blloqet e KEK-ut janë ndotësit më të mëdhenj, sidomos blloku B, që lejohet kundërligjshëm të punojë pa filtra! Urgjentisht, duhet të përfillet ligji dhe rregullat për mjedisin, që të ndalet një ndotje e tillë. Shkaktar tjetër i ndotjes është edhe ngrohja përmes thëngjillit, që vështirë se mund të kontrollohet nga inspektorët e Komunës apo të Qeverisë. Në të gjitha këto raste, për shkak të interesave biznesore, pushtetarët qëllimisht nuk e kanë vënë ujin në zjarr, që të ndërmarrin diçka. Ndërkohë, nga plot shembuj shihet se njerëzit po e pësojnë gjithnjë e më shumë nga sëmundjet respiratore, kancerogjene etj., që ndërlidhen me ajrin e ndotur që depërton në mushkëritë tona. Organet përkatëse duhet të tregojnë se sa është rritur numri i vdekjeve nga këto lloj sëmundjesh, ndërsa shoqëria duhet të reagojë fuqishëm, sepse nëse ia lëmë këtij pushteti të bëjë diçka, do të na kontaminojnë edhe brenda shtëpive tona!

(Kosova Sot)

20 orë e 19 minuta më parë
20/08/18