Pushteti saboton konferencën e Demarkacionit

Në pritje të debatit të 3 gushtit, aktivizohet kolaicioni

Në vend të ballafaqimit të argumenteve, do të shtohet konfuzioni 

Opozita dhe analistët dyshojnë se sipas disponimit të tanishëm dhe paralajmërimeve nga pozita, gjasat janë shumë të mundshme që treshja qeveritare - kryetari i Kuvendit, kryeministri dhe presidenti - e kanë ndërmend që ta manipulojnë këtë takim, duke dërguar aty një numër të madh të përfaqësuesve të Qeverisë, që nuk janë as ekspertë dhe as shkencëtarë

Vetëm edhe pesë ditë kanë mbetur deri te ballafaqimi i ekspertëve dhe politikës me komisionin qeveritar për Demarkacionin e kufirit me Malin e Zi, por ende nuk dihet se çfarë efektesh do të ketë një konferencë e tillë. Deputeti i LDK-së, Adem Salihaj, dëshiron të besojë se pikërisht ballafaqimi i fakteve nga ekspertët para një bindje të tillë qeveritare do të bëjë që të gjendet rruga e zgjidhjes më të mirë të mundshme, ngase edhe ai personalisht është i bindur që qeveritarët po i frikësohen së vërtetës, derisa atë mund ta pranojnë vetëm pas ballafaqimit ballë për ballë të argumenteve nga ekspertiza. "Konferenca dhe debati për Demarkacionin do të jetë i dobishëm, veçanërisht për deputetët, sepse mund të qartësojë shumë aspekte të këtij problemi. Deri më tash është e paqartë se a humbim territor apo jo. Krejt çështja e Demarkacionit është shumë e mjegulluar edhe për faktin se as pas dhjetë muajsh ne nuk kemi marrë asnjë shkronjë material lidhur me këtë problem kaq të madh. Është një përpjekje që gjërat të mbahen në fshehtësi", thekson Salihaj, shkruan sot gazeta "Kosova Sot".

Mundësia e manipulimit të konferencës

"Ne duhet ta shohim materialin dhe duhet ta dëgjojmë mendimin e ekspertëve në mënyrë që, qysh do që të veprojmë, të jemi të bindur se po veprojmë drejt", ka shtuar më tej deputeti Salihaj. "Ka shtete të mëdha që kanë me dekada konteste të pazgjidhura kufitare për 100 apo 200 metra katrorë, kurse në kemi dyshime se po humbim miliona metra katrorë dhe insistohet ta votojmë këtë pa menduar fare, me një lehtësi sikur e hedhim një ambalazh të pavlerë ose i hidhini disa këpucë të vjetra", theksoi ai. Opozita dhe ekspertët ndajnë mendime të tjera, më pesimiste, nga frika se Qeveria do të përpiqet ta manipulojë edhe këtë takim për ta mbuluar dhe devijuar të vërtetën që tani është faktuar nga shumë ekspertë të fushës, e që në këtë konferencë vetëm duhet të riargumentohet edhe një herë para një auditoriumi të politikës dhe zyrtarëve të lartë të shtetit. Këtë konferencë madje, nga rreziku i manipulimit të partive në pushtet, ata e shohin si një "shfaqje" pa asnjë epilog të dobishëm për shtetin, për përafrimin e qëndrimeve të palëve në pozitë dhe opozitë për një zgjidhje konsensuale në interesin nacional, duke lënë anash interesat e politikës ditore. Nënkryetari i AAK-së, deputet i Kuvendit të Kosovës dhe ish-kryetar i komunës së Pejës, Ali Berisha, tha për 'Kosova Sot" se nëse pushteti e mban premtimin se do t'i përfillë faktet që do të prezantohen nga ekspertët, atëherë këtë mundësi e ka ta bëjë në të gjitha veprimet e veta pas konferencës së 3 gushtit."Sipas meje, nga aspekti faktik, shumica e opinionit publik është i bindur që me këtë projektmarrëveshje Kosova humb territor, krijimi i kësaj bindje në opinion është kontribut bukur i madh i partive opozitare, por një falënderim shumë i veçantë shkon edhe për të gjithë ekspertët, të cilët në këtë kohë kanë bërë një punë të jashtëzakonshme, edhe përkundër presioneve të mëdha të institucioneve qeveritare, që provuan ta pengojnë argumentimin e asaj që me këtë projektmarrëveshje Kosova humb territor dhe nuk mbetet aspak e pacenuar", potencoi Berisha.

Deputetët ta mbrojnë sovranitetin e shtetit

Sipas Ali Berishës, edhe në atë debat, ku do të ballafaqohen faktet për Demarkacionin, ekspertët, por edhe të tjerët, do të mundohen ta argumentojnë thellësisht të vërtetën se me këtë version të marrëveshjes Kosova humb shumë territor, "pavarësisht aktiviteteve të mëdha që po i bëjnë institucionet, krerët e këtyre institucioneve dhe partitë politike në pushtet, që në atë mbledhje të sjellin sa më shumë njerëz, të cilët do të mundohet ta argumentojnë të kundërtën që e kemi thënë deri tash dhe e kanë konstatuar edhe vetë ekspertët e kësaj fushe". Ai thotë se nëse deputetët e Kuvendit të Kosovës, edhe ata të pozitës, kanë vetëm pak ndjenjë të mbrojtjes së interesit nacional, sovranitetin e shtetit, atëherë do t'u binden fakteve të ekspertëve dhe jo presionit të politikës, në mënyrë që pas debatit, nëse shkohet në Kuvend, atje të mos jepet vota pro ratifikimit të kësaj marrëveshje."Nganjëherë faktet janë aq kryeforta dhe besoj që sot për sot duhet të bindet edhe pjesa tjetër që Kosova me këtë marrëveshje humb shumë. Tani unë dua të besoj shumë, pavarësisht presionit që po bëhet, se të gjithë ata njerëz që e njohin atë terren ose ata që janë nga ai terren, e kanë të qartë se çka humb Kosova me këtë marrëveshje, sepse nuk po bëhet Demarkacioni, por de-fakto po ndryshon kufiri. Fjala demarkacion nënkupton vetëm shënimin e kufirit aty ku ka qenë, derisa tani me këtë marrëveshje nuk po bëhet shënimi, demarkimi aty ku ka qenë, por po bëhet ndryshimi, devijimi i vijës së deritanishme kufitare në shumë pjesë të tij, ndryshim që po bëhet vetëm në dëm të Kosovës', tha deputeti Ali Berisha.

 

 

Të flasin profesionistët, jo servilët e Qeverisë

Profesori i së drejtës, Riza Smaka, është shumë i bindur se ligjvënësit mund të binden për dëmin që e pëson Kosova nga ratifikimi eventual i këtij versioni të marrëveshjes për Demarkacionin dhe do ta kundërshtonin atë me votë në Kuvend, vetëm nëse në tryezën e 3 gushtit krijohen kushte për analizë të ekspertëve dhe jo për përfshirje në diskutim manipulativ, me qëllim të mbështetjes së qëndrimit të tanishëm të disa pseudo- ekspertëve që do të provojë t'i sjellë aty ekzekutivi për të forcuar qëndrimin e deritanishëm të Qeverisë dhe të subjekteve politike të pozitës si bllok, në mbështetje të kësaj marrëveshje. "Në kuptimin e mirëfilltë, nëse ftohen vetëm shkencëtarët, që të jenë aty prezentë dhe t'i sjellin argumentet e tyre shkencore, sigurisht që ai takim do ta ketë një vlerë shumë të madhe të argumentimit shkencor dhe dhënies së rekomandimeve se si të veprohet tutje, mirëpo, sipas disponimit të tanishëm dhe paralajmërimeve nga pozita, gjasat janë shumë të mundshme që treshja qeveritare, kryetari i Kuvendit, kryeministri dhe presidenti, e kanë ndërmend që ta manipulojnë këtë takim duke dërguar aty një numër të madh të përfaqë- suesve të Qeverisë që nuk janë as ekspertë dhe as shkencëtarë", theksoi ai. "Rrezikohet seriozisht manipulimi i kësaj konference, tani këtu mbetet edhe një pikëpyetje e madhe që duhet të pritet se si do të ndodhin ato zhvillime, nëse vërtet do të pranojë opozita që të marrë pjesë në një konferencë të tillë, kur spekulohen çështjet paraprake që duhet të analizohen shkencërisht. Unë që tani konsideroj se në rast se përgatitet ky skenar i tillë opozita nuk do të duhej fare të merrte pjesë aty, në një konferencë të emëruar si konferencë shkencore, por ku dominojnë dhe japin vlerësim personat të cilët nuk kanë lidhje me atë fushëveprim dhe që nuk janë shkencëtarë të fushës', tha prof. Smaka për 'Kosova Sot'. 

(KOSOVA SOT)