Zgjohet nga koma duke i mbajtur në mend detajet e incidentit
Një viktimë e një djegie të shkallës së lartë është zgjuar nga koma e detyruar me kujtesë të plotë të incidentit, që e kishte lënë me djegie të tmerrshme, në 45 për qind të trupit të tij.
Caleb Gundy, 8-vjeçar, ka qenë në një pronë në Kuinsllëndin jugor të Australisë më 7 qershor kur rrobat e tij kishin marrë flakë, pasi i ishte afruar shumë një zjarri. Ai ishte djegur aq shumë saqë ishte detyruar të transportohej për në spital me helikopter, në gjendje kritike për jetë, transmeton Kosova Sot.
Edhe prindërit pësuan djegie
Nëna e tij, Jodie Silver, ka qenë e pranishme në momentin kur Caleb-i i kishte hapur sytë.
“Momenti kur ai është ngritur nga koma ka qenë një moment i papërshkrueshëm për mua. Jam çliruar kur e kam parë djalin tim tek zgjohet, ka thënë ajo. “Ai ka pasur marramendje, mirëpo na njihte të gjithëve”.
Ajo dhe bashkëshorti i saj, Allan Gundy, gjithashtu kanë pësuar djegie, më të lehta, kryesisht në duar, teksa janë përpjekur ta shpëtojnë të birin e tyre gjatë incidentit. Megjithatë, ajo që i ka habitur të gjithë, përfshirë edhe stafin mjekësor, ka qenë fakti që Caleb-i e ka mbajtur në mend ngjarjen krejtësisht.
“Unë, në fakt, e pata lënë atë që ta fillonte atë bisedë. Pasi që pati filluar të fliste e pata kuptuar që ai ishte në dijeni të asaj ngjarje. Ai madje flet edhe për detajet më të vogla”, ka shtuar e ëma e tij.
Fëmija tani ka filluar rikuperimin
Caleb-i tani u është nënshtruar hapave të parë të rikuperimit, ku, me ndihmën e një fizioterapeuti, do të mësohet që t’i bëjë gjërat elementare, si ulja dhe ecja.
Zotëri Gundy ka thënë që në momentin e parë kur mollëzat e djaloshit të tij kanë filluar të lëvizin, ai e ka ditur që ai dhe familja e tij e kanë fuqinë për të kaluar nëpër katër muajt e gjatë të terapisë.
“Është më të vërtetë një çlirim i madh ta shohësh djalin që i është kthyer normales”, ka thënë ai. “Ai po flet e po buzëqesh, gjë kjo që është një gjë shumë e mirë për ne, që na ka motivuar tej mase për periudhën e rikuperimit”.
(Kosova Sot)