Berisha thotë se Serbia po tallet me shqiptarët për shkak të Ramës
Ish-kryeministri i Shqipërisë Sali Berisha ka hedhur akuza të rënda drejt kryeministrit aktual Edi Rama.
Sipas Berishës, në paraqitjen televizive të dy kryeministrave, Rama dhe Vuçiq, ky i fundit i këputi Ramës një shpoti, në fakt një tallje ekzemplare.
“Ai i tha gazetarit se ‘unë jam lider lokal, kryeministër i Serbisë, kurse zoti Rama është lider botëror’! Kjo ishte një tallje cinike por dhe plotësisht e merituar, ndaj të cilës vet Rama nuk reagoi dot. Natyrisht, nuk më vjen absolutisht kurrë mirë që kryeministri i Serbisë apo cilido kryeministër të tallet me kryeministrin e Shqipërisë. Por për ketë fatkeqësia është e shqiptareve dhe vetëm e jona” ka shkruar Berisha.
Sipas tij, Vuçiq u tall me Ramën pasi deklaratat e tij paranojake, apo të njeriut me hundë në qiell dhe atë ne diell, kane marre dhëne. “Kështu, kjo ishte tallje plotësisht e merituar sepse. Kur bëhesh për t’u tallur, vetëm talljen meriton”.
Sipas Berishës, Rama para nisjes për ne Vjene, kërcënoi BE-në në mediat amerikane për gjakderdhje të mëdha në Ballkan, njëlloj si dikur etërit e tij apo më vonë Millosheviçet, Sheshelet dhe Arkanët e Beogradit. “Ai, si një lloj kasandre donkishoteske deklaroi në mediat italiane se BE po dështon si motor shprese, madje e paralajmëroi Evropën se po rrezikon ‘shpartallimin me themeli’”.
