Mediat spanjolle dhe angleze raportojnë se Icardi i ka kryer testet mjekësore te Real Madridi

Sulmuesi i Interit, Mauro Icardi, i ka kryer testet mjekësore te Real Madridi dhe është i gatshëm t’i bashkohet gjigantit spanjoll gjatë këtij muaji, raporton Daily Express.

Lajmi u raportua nga mediumi spanjoll Diaro Gol që pohoi se Icardi do të jetë transferimi bombë i Real Madridit gjatë afatit kalimtar dimëror.

Lajmi i mediumit spanjoll është bartur edhe te mediat angleze, me Daily Express që shkon edhe më larg sa që raporton se argjentinasi i ka kryer testet mjekësore dhe është i gatshëm ta kompletojë transferimin tronditës në kryeqytetin spanjoll gjatë afatit kalimtar të janarit.

Argjentinasi shihet nga presidenti i Realit, Florentino Perez, si zëvendësuesi ideal i Karim Benzemas, i cili po kalon nëpër formë shumë të dobët.

Ndërkohë, për dallim nga francezi, Icardi është në formë të shkëlqyer pasi ka shënuar 18 gola në 20 ndeshje në Serie A dhe ka një klauzolë lirimi prej 110 milionë euro në kontratën e tij me Interin.

(Kosova Sot)