Spanja arreston marokenin që e lavdëroi vrasjen e mësuesit francez e bëri thirrje për sulme tjera

  • S.A /
  • 31 October 2020 - 13:22
Spanja arreston marokenin që e lavdëroi vrasjen e mësuesit francez e bëri thirrje për sulme tjera

Një burrë maroken është arrestuar në Barcelonë pasi e lavdëroi vrasjen e mësuesit Samuel Paty afër Parisit dhe bëri thirrje për sulme tjera.

Ky person, identiteti i të cilit nuk është bërë publik, u ndalua të premten pasi publikoi mesazhe në rrjetet sociale në përkrahje të vrasjes që ndodhi më 16 tetor, kur mësuesit Samuel Paty iu pre koka nga një i ri me prejardhje çeçene.

“Policia ka arrestuar një burrë me kombësi marokene për krimin e dyshuar të lavdërimit të terrorizmit dhe nxitjen për kryerje të krimeve terroriste”, thuhet në një deklaratë të policisë katalane, të publikuar në rrjete sociale.

I dyshuari u paraqit në një gjykatë në Barcelonë të shtunën dhe u la i lirë me kushtin që ta dorëzojë pasaportën dhe të paraqitet në gjykatë për çdo 14 ditë, njoftoi policia.

Pas sulmit afër Parisit, Franca këtë javë u përball edhe me një sulm tjetër në Nice, ku një sulmues vrau tre persona dhe plagosi disa të tjerë.

Sulmet erdhën në kohën kur zemërimi i myslimanëve ndaj Francës po rritet për shkak të publikimit të karikaturave të profetit Muhamed dhe këmbënguljes së saj për të mos u zmbrapsur nga ky veprim.

Ministrat francezë kanë paralajmëruar se sulme të ngjashme mund të ketë përsëri, ndërsa presidenti Makron ka angazhuar mijëra ushtarë për t’i mbrojtur objektet fetare dhe shkollat.

(Kosova Sot Online