Kardiokirurgjia saboton punën pas pezullimit të drejtorit: Punojmë vetëm për raste emergjente

  • G.G /
  • 02 nëntor 2020 - 13:58
Kardiokirurgjia saboton punën pas pezullimit të drejtorit: Punojmë vetëm për raste emergjente

Të premtën është pezulluar nga puna drejtori i Kardiokirurgjisë dhe Kardiologjisë Invazive, Tefik Bekteshi.

Vendimi për pezullimin e Bekteshit është marrë nga Komisioni Disiplinor i përbërë nga Dr. Florim Zejnullahu, Dr. Nazmi Kolgeci, Zana Morina, Havushe Rexhepi dhe Jehona Vasolli.

Në arsyetim thuhet se drejtori i përgjithshëm i SHSKUK-së Valbon Krasniqi, ka iniciuar procedurë disiplinore ndaj Bekteshit duke u bazuar në shkeljet e gjetura në raportin e auditimit të datës 27 tetor.

Komisioni Disiplinor ka vendosur që ndaj Bekteshit të shqiptohet masa për pezullimin e punës deri në një vendim tjetër.

Por, ky vendim duket se ka sjellur pakënaqësi tek një pjesë e stafit në Kardiokirugji.

Ata i kanë nisur një ankesë ministri Zemaj dhe drejtorit Krasniqi duke kërkuar rikthimin e Bekteshit në punë.

Madje, në ankesë thuhet se ky repart nuk do të vazhdojë me punën normale, por që do të intervenohet vetëm në raste emergjente.

(Kosova Sot Online)