Shtohet prezenca e EULEX’it te selia e PDK’së, kanë me vete edhe disa pako

Zyrtarë të EULEX’it janë parë në selinë e Partisë Demokratike të Kosovës, që nga mëngjesi.

Por, para pak minutash është shtuar edhe më shumë prezenca e EULEX’it në selinë e kësaj partie.

 Ata janë parë duke nxjerrë edhe disa pako nga veturat e tyre.

Menjëherë pas fillimit të bastisjes, në selinë e partisë kanë shkuar edhe Sami Lushtaku e Uran Ismaili.

Ndryshe, Zyra e Prokurorit të Specializuar e ka konfirmuar se është duke kryer operacione në Kosovë.

Përmes një njoftimi drejtur mediave, ZPS’ja ka njoftuar se aksionet po kryhen me mbështetjen e Policisë së Kosovës dhe EULEX’it.

“Zyra e Prokurorit të Specializuar (ZPS) aktualisht është duke kryer operacione në Kosovë. Operacionet e ZPS-së po kryhen me mbështetjen e Policisë së Kosovës dhe Misionit të Bashkimit Evropian për Sundimin e Ligjit në Kosovë (EULEX)”, thuhet në njoftim.

Zyrtarë të EULEX’it aktualisht janë duke kryer bastisje në shtëpinë e ish presidentit Hashim Thaçi, ish-krytarit të PDK’së, Kadri Veselit dhe selinë e Partisë Demokratike të Kosovës.

Dhomat e Specializuara në Hagë dje kanë bërë publike aktakuzën për krime lufte kundër Hashim Thaçit, Kadri Veselit, Rexhep Selimit dhe Jakup Krasniqit.

Më 5 nëntor, Thaçi, Veseli, Krasniqi dhe Selimi u transferuan në qendrën e paraburgimit të Dhomave të Specializuara me seli në Hagë. Ndërkaq, Krasniqi u transferua atje një ditë më parë, më 4 nëntor.

Kjo aktakuzë, prej 68 faqesh, që është e redaktuar, është konfirmuar më 26 tetor 2020, thanë Dhomat e Specializuara.

Veprat që rëndojnë ndaj Thaçit, Veselit, Selimit dhe Krasniqit kanë të bëjnë me krime lufte, ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes, të cilat sipas Dhomave të Specializuara, janë kryer midis marsit 1998 dhe shtatorit të vitit 1999.

(Kosova Sot Online)