Agjencia Evropiane: E qartë, ka lidhje mes vaksinës së AstraZeneca-s dhe mpiksjes së gjakut

  • E.K /
  • 06 April 2021 - 13:18
 Agjencia Evropiane: E qartë, ka lidhje mes vaksinës së AstraZeneca-s dhe mpiksjes së gjakut

Një zyrtar i lartë i Agjencisë Evropiane të Ilaçeve i ka thënë një gazete italiane se është e qartë se ekziston një lidhje mes vaksinës së kompanisë AstraZeneca dhe një lloji të rrallë të mpiksjes së gjakut, por shkaku ende është i panjohur.

“Sipas mendimit tim, mund ta themi këtë tani, është e qartë se është një lidhje me vaksinën, por ende nuk e dimë se çfarë e shkakton reaksionin”, tha shefi për vaksina i Agjencisë Evropiane të Ilaçeve për gazetën “Il Messaggero”.

Raportohet se zyrtari i lartë i ka thënë gazetës së agjencia në të cilën bën pjesë do të dalë me deklaratë për këtë çështje në orët e ardhshme, shkruan The Guardian, transmeton Gazeta Express.

Agjencia tha javën e kaluar se pret që të publikojë rekomandime të përditësuara për vaksinën e famshme gjatë një takimi të komitetit për siguri, që fillon të martën dhe do të vazhdojë deri të premten.

Gjermania, Italia, Franca, Spanja dhe Holanda së fundi e kanë kufizuar përdorimin e vaksinës së kompanisë AstraZeneca për personat nën 60 vjeç për shkak të shqetësimeve rreth mpiksjes së gjakut.

Edhe rregullatori britanik i vaksinave të martën është duke e shqyrtuar mundësinë që ta pezullojë përdorimin e kësaj vaksine për personat nën 30 vjeç.

Dozat e kësaj vaksine kanë arritur edhe në Kosovë. Me të janë vaksinuar qindra punëtorë shëndetësorë si dhe kryeministri Albin Kurti.

(Kosova Sot Online)