Prizrenasja shtatzënë që raportoi dhunimin në motel po jetonte aty me burrin – i dyshuar pronari

  • E.K /
  • 05 maj 2021 - 14:16
 Prizrenasja shtatzënë që raportoi dhunimin në motel po jetonte aty me burrin – i dyshuar pronari

Më 3 maj, një grua nga Prizreni bashkë me burrin e saj shkuan në polici për të raportuar një rast dhunimi seksual. 35-vjeçarja ka deklaruar se derisa ishte duke pushuar në një motel, një burrë i kishte hyrë në dhomë dhe kishte kryer marrëdhënie seksuale me të, pa dëshirën e saj. Media sjell detaje nga ky rast

35-vjeçarja e cila ishte në muajin e katërt të shtatzënisë në muajin mars, kur thotë se u dhunua seksualisht, e kishte fshehur këtë rast nga bashkëshorti i saj për dy muaj.

Më 2 maj, ajo i kishte treguar bashkëshortit të saj për krejt këtë ngjarje, e një ditë më vonë, të dy kishin shkuar në polici për ta raportuar rastin.

Media mëson se 44-vjeçari i cili dyshohet se e dhunoi gruan shtatzënë, është pronar i motelit ku dyshohet të ketë ndodhur rasti, ndërkaq viktima dhe bashkëshorti i saj kanë jetuar për një kohë në objektin e të dyshuarit.

I dyshuari është intervistuar nga policia të hënën, por nuk i ka pranuar akuzat që 35-vjeçarja i ka hedhur mbi të.

“Me datë 3 maj 2021 është intervistuar i dyshuari, në prezencë të avokatit mbrojtës. I njëjti në mënyrë kategorike e ka mohuar veprën. Në deklaratën e dhënë në polici, i dyshuari nuk pranon se ka pasur marrëdhënie seksuale me viktimën”, ka deklaruar për express një burim brenda policisë së Prizrenit.

I njëjti tha se me urdhër të prokurorit, rasti vazhdon në procedurë të rregullt.

Ndryshe, media të martën ka raportuar për këtë rast.

(Kosova Sot Online)