Lexoni edhe:
Policia me aksion “Subvencioni 2021”, pritet arrestimi i 23 personave në disa komuna të Kosovës
Ministri i Bujqësisë Faton Peci ka paralajmëruar mbrëmë se prokuroria dhe organet e ndjekjes nuk do të ndalen deri në zbardhjen e rasteve abuzive në ministrinë që drejton. Peci në një emision ka konfirmuar se është kontaktuar nga organet e krimeve ekonomike dhe se do të vazhdojë të ofrojë informacione lidhur me keqpërdorimet në ministri.
Ndërkaq sot, Drejtoria për Hetimin e Krimeve pritet të arresojtë 23 zyrtarë në komuna të ndryshme që lidhen me operacionin “Subvencioni 2021”.
Ministri Peci mbrëmë u shpreh se marrë parasysh zinxhirin e zyrtarëve të involvuar në marrje dhe dhënie ryshfeti, prokuroria dhe organet e ndjekjes nuk do të ndalen.
“Në kategorinë e subvencioneve është borxhi i madh, involvimi i zyrtarëve që një numër i konsiderueshëm i tyre janë me aktakuza të ngritura, një numër janë nën hetim dhe në paraburgim dhe sipas të gjitha gjasave ka indikacione që kjo nuk përfundon me kaq sepse vala e parë dhe e dytë e arrestimeve në të kaluarën mund të prek edhe zyrtarë të tjerë dhe kjo e vështirson punën në ministri. Unë po supozoj që fakti që aty ka ekzistu një zinxhir në ndërmarrjen e veprimeve në marrje dhe dhënie ryshfeti unë besoj që prokuroria nuk kanë me u ndalë deri në zbardhjen e rasteve”, tha Peci.
Tutje ai u shpreh se është kontaktuar nga organet e ndjekjes dhe do të vazhdojë të ju jap informacione lidhur me abuzimet nga zyrtarë të Ministrisë.
“Unë jam kontaktuar edhe nga organet e krimeve ekonomike njësisë për hetime por edhe nga prokuroria, dhe luftimi i krimit dhe korrupsionit është edhe vullnet i imi, kemi komunikuar dhe vazhdojmë me bashkëpunu shumë ngusht. Ne ofrojmë informacione që zyrtarët e ndjekjes konsiderojnë që janë të dobishme për vazhdimin e proceseve hetimore. Logjika thotë që një nivel aq i lartë i abuzimeve nuk mund të përfundojë vetëm tek zyrtarët që kanë qenë të involvuar deri tash”, tha ai.
(Kosova Sot Online)