Dënohet me 200 euro dhe i konfiskohen gjësendet pasi pranoi se i kontrabandoi nga Serbia
Lulzim Fejzullahi është dënuar me 200 euro gjobë pasi ka pranuar se ka kontrabandaur gjësende shtëpiake, vegla të punës, dhe sende të tjera nga Serbia duke bërë shmangie doganore në vlerë prej 266 euro.
Aktgjykimi është shpallur të martën në Gjykatën Themelore në Gjilan, dega në Kamenicë.
Ndaj të akuzuarit Fejzullahi është bërë edhe konfiskimi i mallit të sekuestruar, raporton “Betimi për Drejtësi”.
Po ashtu, i akuzuari obligohet të paguajë edhe paushallin gjyqësor prej 20 euro, si dhe 30 euro për kompensimin e viktimave.
Aktgjykimi ndaj tij është shpallur nga gjykatësi Sadri Krasniqi, pasi ai paraprakisht në seancën fillestare e ka pranuar fajësinë për veprën penale me të cilën ngarkohet.
Pas leximit të aktakuzës nga prokurorja Sllavica Popoviq, i akuzuari Fejzullahi e ka pranuar fajësinë me të cilën ngarkohet, duke thënë se gjësendet në fjalë kanë qenë të tij dhe ka dashur t’i sjellë në shtëpinë e tij në fshatin Hodonovc të Kamenicës.
“Nuk e kom ditë se nuk është e lejuar përmes kësaj rruge të vij në Kosovë. Nuk kom pas qëllim me ju ik kontrollit doganor, mirëpo e kom bo këta”, ka thënë i akuzuari.
Mbrojtësi i të akuzuarit, avokati Selami Rexhepi i ka propozuar gjykatës një dënim më të butë për të mbrojturin e tij, duke pasur parasysh, sipas tij të gjitha rrethanat lehtësuese.
Ai po ashtu, i ka propozuar gjykatës që malli i sekuestruar t’i kthehet të akuzuarit.
Pranimin e fajësisë nga ana e të akuzuarit nuk e ka kundërshtuar prokurorja Popoviq, duke i propozuar gjykatës që po ashtu malli i sekuestruar të akuzuarit t’i konfiskohet.
Lidhur me këtë, gjykatësi Krasniqi ka marr aktvendim për pranimin e fajësisë, duke shpallur aktgjykim dënues ndaj të akuzuarit Fejzullahi.
Prokuroria Themelore në Gjilan, më 28 maj 2021, ka ngritur aktakuzë ndaj Lulzim Fejzullahit, duke e ngarkuar atë me veprën penale “kontrabandimi i mallrave”, nga neni 311 paragrafi 2 lidhur me paragrafin 1 të Kodit Penal të Kosovës, vepër kjo e sanksionuar me gjobë ose me burgim deri në 3 vjet.
Sipas aktakuzës, më 22 maj 2021 në dalje të fshatit Novosellë, nga policia është ndaluar i akuzuari Fejzullahi duke drejtuar automjetin “Volvo XC 90” me rimorkio ku kishte ngarkuar një biçikletë, aparat për pastrimin e ajrit, një shtrat, dy shtretër për fëmijë, thithëse elektrike, 12 kg rroba personale famljare, një tepihë, 10 palë këpucë, enë kuzhine, tre vat higjienike, një aparat kafeje, 10 adaptera për telefon, 10 dorëza pune, 16 kg lodra fëmijësh, një tavolinë buke, katër burmashina, një hilt për punë, rafta të hekurit, pistoletë për pastrimin e veturës, printer, makinë për polirim të veturës, makinë për gërryerje, karrocë për invalid, pesë kg mjete pune, katër pastruese të ulsëve të veturave, një kuti kozmetikë për vetura, një tenadë atlanta, goma të veturës bashkë me fellga, ngritëse të veturës, tavolinë xhami, një televizor, dhe një shkallë alumini.
Sipas prokurorisë, shumica prej tyre të përdorura dhe të gjitha këto të kontrabanduara përmes rrugëve ilegale nga Republika e Serbisë për në Republikën e Kosovës, pa dokumentacion përkatës mbi transportin dhe prejardhjen e tyre, duke iu shmangur kontrollimit doganor në vlerë prej 266 euro e 71 cent.
(Kosova Sot Online)
