“Pasi u fal gjaku, 25-vjeçari na përqafoi dhe tha tash po shkoj te dajtë për herë të parë”

Prifti Don Lush Gjergji ka rrëfyer një rast emocionues të një djali të ri në rrethin e Ferizajt, familja e të cilit ishte në hasmëri me një familje tjetër.

Gjergji ka thënë se pasi që i ishte falur gjaku familjes së tij, ai kishte thënë se do të shkojë te dajallarët e tij.

Kjo, sepse, ai ishte bërë rreth 25 vjeç pa pasur mundësi asnjëherë t’i vizitojë ata, ndonëse shtëpia e tyre ishte jo më larg se 4 kilometra larg.

“Po ju tregoj vetëm një rast, një i ri 20-25 vjeçar kur u pajtuan dhe e falën gjakun dhe ai ishte i familjes së vrastarëve, po çohet dhe po na përqafon neve e Antonin e njërin e tjetrin dhe po thotë tash po shkoj te dajtë… nuk e kuptova. Tha i kam bërë 25 vjet, 4 km e kam, shpeshherë kam dalë e kam hypë në maje të shpisë dhe e kam këqyrë shtëpinë e dajve e kurrë s’kam guxu me dalë sepse ishim në gjak”, ka rrëfyer Gjergi.

Prifti katolik ka thënë se këtë rast e mban mend freskët edhe sot, duke thënë se mundësia e atij djali për shkollim e civilizim nuk ekzistonte.

“Merreni me mend se në çfarë gjendje ka jetu njeriu, ka lindë e ka jetu deri në moshën 24-25 vjeçare, pa pasë mundësi me dalë nga oborri i shtëpisë”, ka thënë ai.

(Kosova Sot Online)