Një vit pas sulmit në Capitol, Biden e fajëson Trumpin: Pengoi transferimin paqësor të pushtetit
Presidenti amerikan Joe Biden fajësoi Donald Trumpin për trazirat në godinën e Kapitolit më 6 janar, në fjalimin e mbajtur në Kongres 1 vit pas ngjarjes.
“6 janari ishte një sulm i armatosur dhe Donald Trump u përpoq të përmbyste zgjedhjet e lira, Kushtetutën dhe të pengonte transferimin paqësor të pushtetit përmes një grupi huliganësh”, ishin fjalët e Biden.
Sipas tij, për Trump, interesat personale janë më të rëndësishme se ato të vendit: “As gjatë Luftës Civile nuk ka ndodhur një gjë e tillë. Në këtë vend të shenjtë u sulmua demokracia. Ishte një sulm brutal, por populli dhe demokracia rezistuan”.
Një sërë aktivitetesh janë planifikuar nga demokratët me rastin e 1-vjetorit të ngjarjes, por shumica e republikanëve nuk do të jenë të pranishëm.
Qindra mbështetës të Trump mësynë Kongresin më 6 janar të vitit 2021, ndërsa ligjvënësit po certifikonin fitoren e Biden. 4 persona mbetën të vrarë në trazira dhe rreth 725 vetë janë arrestuar.
(Kosova Sot Online)
