Ministri Latifi dhe shefja e UNICEF-it në Kosovë, nënshkruajnë marrëveshjen për vizitat mjekësore të grave në shtëpi

  • E.K /
  • 12 January 2022 - 15:34
Ministri Latifi dhe shefja e UNICEF-it në Kosovë, nënshkruajnë marrëveshjen për vizitat mjekësore të grave në shtëpi

Ministri i Shëndetësisë Rifat Latifi dhe shefja e Zyrës së UNICEF-it në Kosovë, Nona Zicherman  kanë nënshkruar sot Marrëveshjen e bashkëpunimit për Planin e vizitave mjekësore në shtëp.

Nga Ministria e  Shëndetësisë kanë bërë të ditur se programi i vizitave në shtëpi për shëndetin dhe mirëqenien e nënës dhe fëmijës ka filluar të zbatohet në Kosovë në vitin 2014.

Aktualisht ky program është i integruar në sistemin e Kujdesit Parësor Shëndetësor  dhe zbatohet në 22 komuna të vendit.

Sipas MSH’së, programi i vizitave në shtëpi ka për qëllim përmirësimin e qasjes në shërbime të Kujdesit Parësor Shëndetësor për gratë shtatzëna, fëmijët nën 3 vjeç dhe prindërit e tyre, veçanërisht për familjet e cenueshme.

Ministri Latifi dhe Zicherman vlerësuan se objektiv është zgjerimi i këtij programi në të gjitha komunat e Kosovës, me qëllim që përmes mjekëve dhe infermierëve të trajnuar, të ofrohen shërbimeve shëndetësore të integruara dhe gjithëpërfshirëse për fëmijët dhe gratë shtatzëna gjatë vizitave mjekësore në shtëpi, ndërkohë që u pajtuan të zgjerojnë mundësitë e bashkëpunimit edhe në projekte të tjera në dobi të të gjitha komuniteteve në tërë territorin e Republikës së Kosovës.

Programi i vizitave mjekësore në shtëpi zbatohet nga MSh dhe Kujdesi Parësor Shëndetësor, me përkrahjen e Zyrës së UNICEF-it në Kosovë, përmes fondeve të Qeverisë së Luksemburgut.

(Kosova Sot Online)