Lexoni edhe:
14 vite në pavarësi, asnjë politikan nuk ka marrë verdikt të formës së prerë për krim ekonomik!
Fillon parakalimi i kuadrateve të FSK’së dhe Policisë së Kosovës në sheshin “Nëna Terezë”
Me rastin e 14 vjetorit të pavarësisë së Kosovës, ka filluar edhe parakalimi i kuadrateve të FSK-së dhe të Policisë së Kosovës në sheshin “Nëna Terezë”.
Me këtë rast, presidentja e Kosovës, Vjosa Osmani tha se teksa kuadratetet e FSK’së dhe Policisë së Kosovës do të marshojnë në shtetet e Prishtinës, do të kujtohet sakrifica e brezave të shumtë për liri, sakrifica e dëshmorëve dhe ish-presidenti Ibrahim Rugova.
“Jam krenare që ndodhem sot këtu para jush në këtë parakalim të ushtrisë tonë në 14 vjetorin e Republikës së Kosovës. 14 vite të shtetësisë së Kosovës nuk janë shumë por nuk janë aspak për ta kujtuar rrugën e vështirë për ta bërë shtetin. Këta djem dhe vajza që do të parakalojnë para jush janë personifikimi më i mirë i shtetit të Kosovës, ata nuk janë vetëm siguria jonë, por edhe garanca për çdo cep të territorit të Kosovës. Ata janë identiteti i shtetit tonë të ri për të cilin dhamë shumë mund dhe për të cilin po punojmë çdo ditë e më shumë. Secili nga njerëzit e këtij vendi ka bërë diçka për këtë ditë, secili në mënyrën e vetë ka bërë diçka që Kosova të bëhet shtet prandaj sot jemi këtu dhe përulemi me respektin më të madh ndaj gjithë atyre që ëndrrën tonë për shtetin e e bënë realitet”, ka deklaruar Osmani.
Ajo tha se ushtria e Kosovës që do të parakalojë sot në sheshet e Prishtinës është e përgatitur për të mbrojtur territorin e Kosovës.
Ndërsa, kryeministri Albin Kurti i uroi 14 vjetorin e pavarësisë Ushtrisë së Kosovës dhe Policisë së Kosovës.
Kurti tha se në këtë ditë janë mirënjohës, të bashkuar dhe se reflektojnë mbi idealet e tyre.
“Sot bashkohemi edhe në fuqi edhe në festë. Në këtë ditë jemi mirënjohës, jemi të bashkuar dhe reflektojmë mbi idealet tona. Në ditën e pavarësisë së republikës, e shikojmë të kaluarën dhe bashkohemi në aspiratat e të ardhmes së ngritur të popullit tonë, mirënjohës dhe të përkulur para sakrificës, krenar dhe me vullnet të pashoq për të ardhmen të cilën së bashku po e ndërtojmë”, ka deklaruar ai.
(Kosova Sot Online)
