Presidentja Osmani kalon përmes qytetarëve në shesh e rrethuar me mbi 10 truproje

Pas një seance solemne në Kuvendin e Republikës së Kosovës, që u përcoll edhe me një revoltë të opozitës e cila edhe e lëshoi sallën e Kuvendit teksa Kurti mbante fjalim, në sheshin kryesor të Prishtinës është mbajtur edhe ceremonia e parakalimit të Ushtrisë së Kosovës

Podiumi i rezervuar për krerët e shtetit nga ku do të përcillinin parakalimin e Ushtrisë së Kosovës ka qenë i vendosur në sheshin Zahir Pajaziti.

Ajo që ka rënë në sy para fillimit të parakalimit, ka qenë arritja e presidentes së Republikës së Kosovës, Vjosa Osmani, e cila pas zbritjes nga vetura zyrtare në afërsi të Hotel Grandit e deri tek bina, është shoqëruar nga një numër i madh i truprojave.

Siç shihet në transmetimet direkte, mbi dhjetë truproje janë përkujdesur për sigurinë e presidentes Vjosa Osmani, e cila ka kaluar përmes qytetarësh deri ka arritur tek podiumi ku po e prisnin kryeministri Kurti e kryekuvendari Konjufca.

Presidentja Osmani ka qenë e shoqëruar nga bashkëshorti, dy vajzat dhe pjesëtarë të tjerë të stafit të saj.

Një show të tillë me truproja më herët e kishte dhënë edhe kryeministri Albin Kurti, i cili ishte i përcjellë nga të paktën shtatë truproje pasi kishte zbritur nga vetura zyrtare dhe ishte nisur drejt fakultetit Juridik në Prishtinë për të votuar në balotazhin e 14 nëntorit.

(Kosova Sot Online)