Paralajmëron analisti: Serbia dhe Kosova do të gjenden në ‘rentgenin politik’ të SHBA-së

Shkruan: ANALISTI-Zef Prenka

Deri më sot, politika e jashtme e SHBA-së ndaj Kosovës dhe Serbisë shpesh është parë si një përpjekje për të mbajtur qetësinë dhe për të shmangur krizat e dhunshme. Unë po i referohem deklaratës së Tammy Bruce që shënon fundin e kësaj epoke. Përdorimi i emrit të Presidentit Donald Trump nuk është thjesht një referencë protokollare; është një mjet presioni që tregon se tani kërkohet një “fitore diplomatike” e shpejtë dhe e prekshme.

Lexoni edhe:

Mulliqi: Kosova është vendi më pro-amerikan derisa Serbia është aleati besnik i Rusisë

-Uashingtoni po sinjalizon se nuk ka më kohë për procese që zgjasin pafundësisht pa prodhuar një rezultat final. Tani, Serbia dhe Kosova do të gjenden në “rentgenin politik” të SHBA-së. Kur SHBA-ja përdor termin “teatër”, ajo godet drejtpërdrejt strategjinë e brendshme të Albin Kurti dhe Aleksandar Vučić. Analiza sugjeron se Uashingtoni i sheh tensionet e shpeshta në veri të Kosovës ose retorikën e ashpër nga Beogradi si një shfaqje të koordinuar (ose të paktën të shfrytëzuar) për të rritur popullaritetin elektoral. Duke e quajtur “teatër”, SHBA-ja po u bën me dije liderëve se maska e tyre ka rënë dhe se komuniteti ndërkombëtar nuk do të lejojë më që dialogu të përdoret si mjet për konsum të brendshëm politik.

Ndryshe nga diplomacia klasike që bazohet te premtimet (premtimet për integrim), kjo qasje e re bazohet te “shkopi” (pasojat e drejtpërdrejta). Populli amerikan dhe Shtëpia e Bardhë po vëzhgojnë, që do të thotë se çdo veprim pengues do të ketë një kosto të lartë personale për liderët. Kjo mund të përkthehet në humbje të legjitimitetit ndërkombëtar, sanksione të mundshme ekonomike, apo edhe të mbështetjes së drejtpërdrejtë amerikane për forcat opozitare që premtojnë lëvizje më të shpejtë në dialog.

Rrjedhimisht, situata ka kaluar nga këshillat diplomatike në një ultimatum të hapur. SHBA-ja po kërkon një ndryshim rrënjësor të qasjes, ku “ulja e tensioneve” nuk është më një sugjerim, por një kusht për të ruajtur marrëdhëniet me Uashingtonin. Kurti dhe Vuçiç ndodhen para një udhëkryqi: të braktisin retorikën e të kaluarës për të mbijetuar politikisht në sytë e SHBA-së, ose të rrezikojnë të etiketohen si pengues të stabilitetit global.

Shkrimet në këtë rubrikë nuk shprehin qëndrimet e gazetës "Kosova Sot Online".