Lexoni edhe:
Nuk është fajtore Qeveria, zbrazja e këtij vendi ka filluar prej vitit 2008 e këndej
Instituti për Politika Sociale: Qeveria e Kosovës ta trajtojë seriozisht mundësinë e krizës ushqimore
Duke pasur parasysh situatën aktuale mes Rusisë dhe Ukrainës është me rëndësi t’i kushtohet vëmendje rrethanave potenciale të cilat mund të krijohen nga përshkallëzimi i krizës.
Së bashku, Rusia dhe Ukraina përbëjnë rreth 29% të prodhimit dhe eksportit të grurit në tregun global. Ukraina është prodhuesja më e madhe e grurit në kontinentin e Evropës dhe është prodhuese e madhe e misrit dhe vajit të lulediellit. Po ashtu, shumë vende evropiane importojnë gaz natyror nga Rusia, thonë nga Instituti për Politika Sociale “Musine Kokalari”
Sipas këtij instituti kriza në Ukrainë do të ndikojë në rritjen e çmimit të grurit.
“Një prodhim dhe eksport aq i madh i grurit si produkt bazë ushqimor dhe i gazit natyror do të ndikohej pashmangshëm në rast të përshkallëzimit të krizës në Ukrainë dhe pas vendosjes së sanksioneve ndaj Rusisë. Nëse kujtojmë vitin 2014, çmimi i grurit në tregun ndërkombëtar ishte rritur për 20% në kohën e pushtimit të Krimesë nga Rusia. Përshkallëzimi eventual i krizës atje do ta cenojë seriozisht sigurinë globale të ushqimit. Përkundër angazhimit deklarativ të shteteve perëndimore që do të punojnë së bashku për t’u siguruar se ky cenim nuk do të ndodh, gjasat janë reale që sasia e mangët do ta ngris çmimin e artikujve ushqimor globalisht. Pra që krizës energjetike që nuk po përfundon mund t’i shtohet edhe kriza e ushqimit”, thuhet në njoftim.
Shumica e vendeve të Lindjes së Mesme, Kinës dhe Afrikës Veriore importojnë dhe varen nga prodhimi i grurit, misrit dhe vajit të lulediellit nga Rusia dhe Ukraina. Në rast mungese, kërkesat do të drejtohen te vendet e tjera dhe kjo pashmangshëm do të ndikonte në rritjen e çmimit të këtyre produkteve, në masë edhe të energjisë në Evropë.
Ndonëse e ardhmja mbetet e paqartë është tejet e rëndësishme që Qeveria e Kosovës ta trajtojë seriozisht mundësinë e krizës eventuale. Po ashtu është e nevojshme të njoftohen drejtë dhe saktë qytetarët, në mënyrë që të shmangen situatat e rrezikshme të lajmeve të rreme dhe të panikut që mund të shkaktojnë paqartësi.
Nëse i marrim parasysh edhe pasojat e pandemisë së Covid-19 dhe rritjes së çmimeve, që tashmë ka ndodhur, si për produkte të ushqimit ashtu edhe për energji, trajtim urgjent i kësaj situate është tejet i rëndësishëm.
(Kosova Sot Online)
