Aksident i rëndë tek mensa e studentëve në Prishtinë, vetura godet 4 vajza
Një aksident trafiku ka ndodhur para disa minutash përballë mensës së studentëve në Prishtinë, përkatësisht në afërsi të zyrave të LDK-së, dega e Prishtinës.
Media ka kontaktuar me Policinë e Kosovës, e cila ka konfirmuar aksidentin. Zëdhënësi i Policisë së Kosovës për rajonin e Prishtinës, Agron Borovci ka thënë se aksidenti ka ndodhur rreth orës 18:00, në rrugën “Afrim Zhitia”.
Ai ka thënë se të katër këmbësorët kanë pësuar lëndime dhe janë dërguar për trajtim mjekësor në QKUK
“Rreth orës 18:00, është raportuar për një aksident trafiku të ndodhur në rrugën “Afrim Zhitia” në Prishtinë. Nga informatat e para bëhet e ditur se në aksident janë përfshirë një veturë dhe katër këmbësor. Për pasojë, katër persona, kanë pësuar lëndime trupore dhe të njëjtit janë dërguar për trajtim mjekësor në QKUK”, ka thënë Borovci
Për aksidentin e ndodhur, kanë nisur hetimet nga njësitë rajonale të trafikut, ka konfirmuar Borovci.
“Njësia rajonale e trafikut ka dalë në vendin e ngjarjes dhe ka nisur një hetim lidhur me rrethanat e këtij aksidenti”, ka thënë në fund ai.
(Kosova Sot Online)
