Akuzohen për shpëlarjen e mbi 125 mijë eurove: Ngritet aktakuzë ndaj 6 personave
Prokuroria Speciale e Republikës së Kosovës ka ngritur aktakuzë në Gjykatën Themelore në Prishtinë kundër gjashtë të pandehurve Florim Lajçi, Shabedin Reka, Hamëz Limaj, Arment Orana, Avdush Qukovci dhe Lavdim Sllamniku,
Përmes një komunikate për media, bëhet e ditur se ekziston dyshimi i bazuar se në periudhën kohore gjatë vitit 2021 e deri ditën që u arrestuan, të pandehurit Arment Orana dhe Shabedin Reka kanë poseduar shumën e të hollave prej 125 mijë e 240 euro kartëmonedha me ngjyrë, ani pse e kanë ditur se t ënjëjta janë përfituar kundërligjshëm.
“Prokuroria Speciale njofton opinionin publik se ekziston dyshimi i bazuar mirë se, në periudhën kohore gjatë vitit 2021, e deri në datën e arrestimit të tyre me 20.10.2021, në lokacione të ndryshme në Kosovë, të pandehurit A.O., A.Q dhe Sh.R, kanë poseduar shumën e të hollave prej njëqindenjëzetepesë mijë e dyqindedyzet (125.240.00) euro, kartëmonedha me ngjyrë, edhe pse e kanë ditur se të njëjtat janë përfituar përmes aktivitetit kriminal nga kryes aktualisht të panjohur të cilët i kishin siguruar ato me përdorimin e forcës apo mjeteve tjera të forta tek institucionet financiare brenda apo jashtë Kosovës. Të pandehurit A.O., A.Q dhe Sh.R., me dashje dhe në bashkëkryerje kanë kryer veprën penale ‘’Blerja, pranimi ose fshehja e sendeve të përfituara me kryerjen e veprës penale’’, nga neni 333 paragrafi 1 lidhur me nenin 31 të KPRK-së”, thuhet në njoftim.
Po ashtu në njoftim thuhet se gjashtë të dyshuarit kanë tentuar që t’i këmbejnë paratë me ngjyrë me para origjinale në shumën prej 30 për qind të shumës së përgjithshme, e më pas ato t’i transferojnë te një person i tretë me qëllim që të njëjtat të pastrohen dhe të vihen në qarkullim.
“Gjithashtu, ekziston dyshimi i bazuar mirë se, më datë 20.10.2021, duke vepruar në bashkëkryerje dhe pas një koordinimi paraprak mes tyre, të pandehurit F.L., Sh.R., H.L., A.O., A.Q dhe L.S., me dashje dhe duke e ditur se pasuria e caktuar, shuma e të hollave prej njëqindenjëzetepesë mijë e dyqindedyzet (125.240.00) euro, të cilat ishin kartëmonedha me ngjyrë, është siguruar përmes aktivitetit kriminal, janë përpjekur që t’i këmbejnë ato me para origjinale në shumën prej 30 % të shumës së përgjithshme, t’i transferojnë ato tek personat e tretë me qëllimin që të njëjtat të pastrohen dhe të vihen në qarkullim si të siguruara në mënyrë të ligjshme për të fshehur në këtë mënyrë natyrën dhe burimin e vërtetë. Me këto veprime të pandehurit F.L., Sh.R., H.L., A.O., A.Q dhe L.S., në bashkëkryerje kanë kryer veprën penale ‘’Shpëlarja e parave’’, nga neni 302 lidhur me nenin 31 të Kodit nr. 06/L-074 Penal të Republikës së Kosovës (KPRK) dhe lidhur me nenin 56 paragrafi 1 të Ligjit nr. 05/L-096 për Parandalimin e Pastrimit të Parave dhe Luftimin e Financimit të Terrorizmit”, thuhet në komunikatë.
PRSK njofton se po ashtu i pandehuri Arment Orana, në shtëpinë e tij ka mbajtur në pronësi, kontroll dhe posedim një armë gjuetie, dylbi e vendosur në armë, karikator i zbrazët, thikë, 20 fishekë, ndërsa Lavdim Sllamniku në shtëpinë e tij ka mbajtur në pronësi, kontroll dhe posedim një pistoletë me katër fishekë.
“Po ashtu, i pandehuri A.O., në shtëpinë e tij ka mbajtur në pronësi, kontroll dhe posedim një armë gjuetie “mosberg patriot” kalibri 30.06 Laser i armës, Dylbi e vendosur në armë, Karikator i zbrazet, thikë me futrollë me mbishkrim Byker, 20 fishek kalibri; ndërsa i pandehuri L.S., në shtëpinë e tij ka mbajtur në pronësi, kontroll dhe posedim një pistoletë të tipit Zoraki M906T me katër copë fishek kalibër 7.65 mm, në shkelje të ligjit të zbatueshëm lidhur me armët e tilla. Me këto veprime të pandehurit e lartcekur, secili prej tyre veç e veç kanë kryer veprën penale ‘’Mbajtja në pronësi, kontroll ose posedim të armëve’’, nga neni 366 paragrafi 1 të KPRK-së”, thuhet tutje në komunikatën e Prokurorisë.
Kujtojmë se gjashtë të pandehurit janë kapur më 20 tetor 2021, me mbi 125 mijë euro të ngjyrosura, në parkingun e një pompe të derivateve, që gjendet në Çagllavicë. Këto mjete dyshohet se janë derivat i krimit për çka ishte bërë përgatitja që të pastroheshin nga ngjyra dhe të viheshin në qarkullim si para legale.
Krahas arrestimit të 6 personave të dyshuar për këtë rast, gjatë këtij aksioni të Policisisë janë sekuestruar edhe 5 vetura.
(Kosova Sot Online)
