Sveçla i përgjigjet Jasharit pasi tha se kryeministri Kurti po bën përpjekje ta kthejë Serbinë në Kosovë
Ministri i Punëve të Brendshme të Kosovës, Xhelal Sveçla i është përgjigjur Xhavit Jashari nga Shoqata e Familjeve të Dëshmorëve, i cili në protestën e veteranëve ka thënë se kryeministri Albin Kurti po bën përpjekje që ta kthejë Serbinë në Kosovë.
Sveçla ka listuar arsyet pse kjo deklaratë e Jasharit nuk qëndron.
Sipas tij, në qeverisjen Kurti, për herë të parë Serbia nuk ka mbajtur zgjedhje në territorin e Republikës së Kosovës.
“Nën qeverisjen tonë është hera e parë që Serbia nuk mban zgjedhje në territorin e Republikës së Kosovës, nuk mban referendum, Lista Srpska nuk është faktor derteminues për punën e Kuvendit të Kosovës, sic ka qenë më herët, kemi shtrirje të sovranitetit në veriun e Kosovës, kemi kundërshtim të suksesshëm të rolit negativ të Serbisë në rajon nga ana e qeverisë së Kosovës. Asnjë marrëveshje të dëmshme qeveria Kurti nuk i ka sjell Kosovës.
Për të thënë këso deklarata mendoj që as nuk vlen që më shumë të diskutohet”, tha Sveçla ’ në Ktv.
Jashari ka thënë se ka disa arsye pse dyshon që Kurti po bën përpjekje ta kthejë Serbinë në Kosovë, duke filluar nga qëndrimi i Lëvizjes Vetëvendosje për raporton e Dick Martyt e deri te heshtja e Qeverisë për dënimin e ish-krerëve të UCK-së, Hysni Gucati e Nasim Haradinaj në Hagë.
(Kosova Sot Online)
