Kryediplomati grek takon edhe QUINT’in, Ambasadori gjerman zbulon diçka nga bisedat

Kryediplomati grek Nikos Dendias ka njoftuar se sot është takuar me shefat e Misioneve dhe Zyrave të Organizatave Ndërkombëtare dhe Rajonale në Prishtinë si dhe me ambasadorët e QUINT’it.

Dendias përmes një cicërime në Twitter tha se në këtë takim kanë diskutuar për situatën gjeopolitike rajonale e për dialogun Kosovë-Serbi.

“U takova me Shefat e Misioneve dhe Zyrave të Organizatave Ndërkombëtare dhe Rajonale në # Prishtinë dhe Ambasadorët e #Quint – fokusi ishte në situatën gjeopolitike rajonale, dialogun Beograd-Prishtinë dhe perspektivën e BE-së të #Ballkanit Perëndimor”, tha Dendias.

Ndërsa, përmes një cicërime në Twitter, ambasadori gjerman John Rohde e ka falënderuar kryediplomatin grek për takimin dhe diskutimet që patën.

Rohde tha se në këtë takim u diskutua për rëndësinë e stabilitetit të shteteve të Ballkanit Perëndimor dhe integrimin e tyre në strukturat evropiane.

“Faleminderit @NikosDendias. Vërtet një diskutim i mirë dhe i paparë. Marrëveshje e plotë me Greqinë për rëndësinë e stabilitetit dhe prosperitetit për vendet e Ballkanit Perëndimor dhe integrimin e tyre në strukturat evropiane”, shkroi Rohde.

(Kosova Sot Online)