Rizvanolli me buzëqeshje pret shiritin, reagon Pireva: Renovimi i soliterëve s’do të bëhej pa NPB-në

Udhëheqësi Operativ i Ndërmarrjes Publike Banesore në Prishtinë, Drilon Pireva ka reaguar pasi që ministrja e Ekonomisë, Artane Rizvanolli ka marrë pjesë në përurimin e projektit të MCC-së për renovimin e soliterëve në Ulpianë.

Pireva ka thënë se ky projekt nuk do të realizohej pa NPB-në.

“Zonja ministre, buzëqeshja jote në prerjen e shiritit të soliterat është puna e paqme e NPB-se. MCC vërtet ka financuar, por organizimi i banoreve dhe drejtimi i projektit aty në këtë përmasë thjesht nuk do të behej pa NPB-në. Ne kështu flasim. Pushteti yt dje suli 9 deputetë në sallë gjyqi për ta bankrotuar NPB-në. 9 deputetë në gjyq, për një çështje të gjykuar, të kryer, pa gjetur asnjë shkelje, asnjë bazë. Deputetët kërkuan Aranit Celen, jo mbrojtjen e pronës publike.  Nuk është vetëm projekti i soliterëve ku shihet puna jone; i kemi rinovuar dhe administrojmë me mbi 600 hyrje të ndërtesave në Prishtinë; Kemi themeluar Departamentin e Intervenimeve Urgjente i cili po sanon çdo dite infrastrukturën publike – deri me tani mijëra gropa të mbyllura në Prishtinë;  NPB për pesë vite nga 90  punëtorë i ka arritur edhe 200 të tjerë; NPB-në e kemi gjetur me 3 milionë humbja të akumuluar, tash është mbi 4 milionë fitim të akumuluar. D.m.th diferenca është 7 milionë fitim”, ka shkruar ai.

Pireva ka thënë se asuria e NPB nga 12 milionë është rritur në 84 milionë.

“Raportet e auditimit, janë përmirësuar nga opinioni i kundërt në opinion të pakualifikuar;  S’ka lidhje po thotë pushteti. NPB duhet me bankrotu sepse nuk ka mundësi me bo mire askush tjetër përveç nesh”, ka deklaruar ai.

(Kosova Sot Online)