Mbrëmë është lënduar një polic i Kosovës në Zveçan – vetura e policisë u sulmua me armë të gjata
Policia e Kosovës ka njoftuar se dje mbrëmë, në fshatin Serbovc, Komuna e Zveçanit, një Polic i Kosovës është lënduar, pasi një patrullë e policisë u sulmua nga persona të armatosur me armë të gjata nga një automjet i tipit Audi me targa KM, transmeton "Kosova Sot Online".
Në njoftimin e policisë thuhet se vetura e policisë ka pësuar dëme të konsiderueshme materiale.
Njoftimi i Policisë:
Sot me datë 08.12.2022, rreth orës 23:00, në fshatin Serbovc, Komuna e Zveçanit, Njësitet policore deri sa kanë qenë në detyra të rregullta, në patrullim, janë sulmuar nga persona të armatosur me armë të gjata, nga një automjet i tipit Audi, ngjyrë hiri, me targa KM.
Si pasoj e incidentit, një pjesëtarë i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë.
Njësitet relevante policore kanë dalë në vendngjarje, për të kryer hetimet, kurse zyrtari policor i lënduar është transportuar në QKMF për ofrimin e ndihmës mjekësore.
(Kosova Sot Online)