'Skandali McGonigal'/ Mediat amerikane: Miku i Ramës punonte edhe për një tjetër miliarder rus

Miku i Edi Ramës, Charles McGonigal, nuk punonte vetëm për një oligark rus.

Ish-zyrtari i lartë i FBI-së, i arrestuar dhe akuzuar nga autoritetet amerikane, punonte në heshtje edhe për një tjetër miliarder rus.

Kështu raporton gazeta amerikane ‘New York Post’.

Sipas saj, McGonigal ishte punësuar nga miliarderi rus, Vladislav Doronin, një ish-kampion i arteve marciale i kthyer në manjat të pronave. Disa thonë se ai është versioni rus i Donald Trump.

Gazeta shkruan se McGonigal u punësua nga kompania e Doronin, Aman Resorts, si përgjegjës për sigurinë e rrjetit të hoteleve me 5 yje në 24 vende të botës.

Burimet thonë se edhe kur McGonigal u arrestua në aeroportin JFK në Nju Jork të shtunën, po kthehej nga një udhëtim biznesi në Sri Lanka, ku kompania Aman ka disa hotele luksoze.

Një zëdhënës i kompanisë tha se ata e kanë punësuar McGonigal vitin e kaluar, por se ai është larguar disa kohë më parë.

Të hënën, 54-vjeçari McGonigal u padit për pastrim parash dhe dhunim të ligjit amerikan të sanksioneve. Në akuzë thuhet se ai punoi për heqjen e sanksioneve amerikane ndaj oligarkut rus, Oleg Deripaska. Ky i fundit njihet si mik i ngushtë i presidentit rus, Vladimir Putin.

Po ashtu, Deripaska e pagoi McGonigal që të hetonte një oligark rival.

(Kosova Sot Online)