I hoqën tumorin 5 kg nga trupi, mjeku shqiptar: Gruaja mendonte se kishte apandesit, ishte në kufirin e fundit

Dje në Shqipëri në një prej materniteteve është realizuar me sukses largimi i një tumori të një nënë e re, ku ndërhyrja zgjati deri në 3 orë e gjysmë, duke i shpëtuar jetën kësaj gruaje, transmeton “Kosova Sot Online”.

Sipas ministrisë të Shëndetësisë, ky tumor ishte i rrallë pasi kishte një masë të madhe (5 kg).

I ftuar në “ABC e Mëngjesit”, kirurgu gjinekolog, Dr. Fatjon Balla tha se, pacientja në fillim mendonte se kishte një apandesit, por pas disa ekzaminimeve kur shkoi në spital doli që kishte një tumor.

Mjeku Balla tha se ishte në kufirin e fundit, është kapur në kohë.

“Pacientja ankohej nga dhimbje jo shumë dominuese dhe në një moment ishte paraqitur në urgjencën kirurgjikale me mendimin që kishte një apandesit dhe aty i ishin bërë disa ekzaminime dhe ishte konstatuar tumori me të tilla përmasa.

Bëhej fjalë për një grua që kishte dy lindje me operacion cezarian. Ajo nuk kishte bërë kontrolle periodike, kishte bërë vetëm një kontroll para shumë vitesh. Kontrollet periodike janë domosdoshmëri. Duhen filluar shumë herët nga femrat dhe duhet të vazhdojnë gjatë gjithë jetës me rregullin e tyre të përcaktuar dhe kjo do të çonte në zbulimin në kohë të shumë pateologjive që çojnë në marrjen e jetës.

Kjo ndërhyrje shkoi deri në 3 orë e gjysmë sepse masa ishte shumë e aderuar me strukturat përreth, me zorrët, me kolën. Kirurgjia në këtë rast është radikale. Hiqet tumori dhe organet ku persupozohet që tumori është i përhapur. Ishte në kufirin e fundit, është kapur në kohë”, u shpreh Dr. Balla.

(Kosova Sot Online)