Deputeti i PDK-së: Humbjet në Trust gjatë këtij muaji, janë rreth 60 milion euro
Deputeti i PDK-së, Ferat Shala, ka thënë se situata në Trust është alarmante dhe që gjatë këtij muaji humbjet në Trust janë rreth 60 milionë euro, përcjell “Kosova Sot Online”.
Shala ka shkruar se gjatë vitit 2022, të gjithë kontribuesit e vendit kanë humbur hiq më pak se 118 milion euro mjete të tyre në Trust.
Ai ka shtuar se po vërtetohet se kërkesa e PDK-së për tërheqjen e mjeteve të Trustit nga qytetarët ka qenë e drejtë.
Postimi i tij i plotë:
Humbjet në Trust gjatë këtij muaji, janë rreth 60 milion euro!
Situata në Trust është alarmante!
Gjatë vitit 2022, të gjithë kontribuesit e vendit kanë humbur hiq më pak se 118 milion euro mjete të tyre në Trust. Trendi i rënies së aksioneve është në situatë shqetësuese edhe këtë vit.
Vetëm gjatë këtij muaji që jemi tani, konkretisht nga data 1 mars deri më sot, në Trust kemi humbur rreth 60 milion euro!
Përkundër kësaj situate, Qeveria ende nuk e ka vendosur bordin menaxhues. Rreth 3 miliard euro të Trustit janë në mëshirën e rrethanave dhe kohës, nën mëshirën e tregjeve globale, praktikisht nën mëshirën e askujt!
Jo shumë larg nga tash, kur Partia Demokratike kërkonte që një pjesë e mjeteve t’iu kthehej qytetarëve, atyre që kishin kontribuar, Qeveria dhe mazhoranca me këmbëngulje refuzuan dhe votuan kundër, në emër të ruajtjes së skemave sociale për moshën e penzionimit.
Koha po e vërteton kërkesën e drejtë e legjitime të qytetarëve për Trustin, sidomos sot kur humbjet janë në total rreth 200 milion euro.A ka Qeveri ky vend?!
(Kosova Sot Online)
