Ja sa për qind e familjeve në Kosovë kanë përdorur drurin si lëndë djegëse për ngrohje

Në raportin “Konsumi i Energjisë në Ekonomi Familjare, 2022“, prezantuar nga Agjencia e Statistikave të Kosovës, thuhet se mbi 80 për qind e familjeve në Kosovë kanë përdorur drurin si lëndë djegëse për ngrohje kurse rreth 18 për qind e tyre kanë shpenzuar gaz, duke shtuar se mesatarisht ngrohen rreth 52.67m2 për ekonomi familjare, transmeton gazeta “Kosova Sot Online”.

“Sa u përket lëndëve djegëse, dru zjarri ishte më i përdorur gjerësisht me një mesatare të përdorur në 82.33 për qind të ekonomive familjare. Po ashtu, vend të konsiderueshëm merr edhe GLN (gazi) me 17,8 për qind”, thekson raporti.

Sipas ASK-së, territori i Kosovës mbulohet 100 për qind me energji elektrike.

“Territori i Kosovës mbulohet 100 për qind me energji elektrike, ndërsa për ngrohje përdoret dru zjarri në mesatare të 82.33 për qind të ekonomive familjare”, shton ASK-ja.

“Analizat e energjisë dhe lëndëve djegëse të konsumuara (sipas numrit të amvisërive) treguan se energjia elektrike është përdorur në 100 për qind të ekonomive familjare, 4.19 për qind nga ngrohja e blerë nga sistemet e ngrohjes qendrore”, përfundon raporti.

(Kosova Sot Online)